Кыргыдайга — Аҕам саастаахтар декадалара

Бүлүү улууһун Кыргыдай нэһилиэгэр  аан дойду үрдүнэн бэлиэтэнэр Аҕам саастаахтар күннэрин декадатын чэрчитинэн, ааспыт нэдиэлэ саҥатыттан «Сөбүлүүр дьарыгым» быыстапка, босхо баттах кырыйыытын өҥөтө, маастар-кылаастар, көрдөөх оонньуулар ыытылыннылар.

Декада субуотаҕа бэрт сэргэх, көхтөөх, көрдөөх оонньуулардаах, үүттээх итии чэйдээх, өлгөм астаах сандалы тула олорон истиҥ көрсүһүүнэн түмүктэннэ. Ону таһынан олохтоох дьаһалта бииргэ олорбуттара 50 сыл буолбут элбэх оҕолоох, иллээх-эйэлээх Быкановтар, Окоемовтар дьиэ кэргэттэрин эҕэрдээлэтилэр.

Нэһилиэк сайдыытыгар биллэр-көстөр кылааттарын киллэрсибит, үлэни өрө туппут сэрии сылларын оҕолоругар Алексеева А.К, Ердашева М.Д, Яковлева П.Ф, Григорьева А.Г.  «Кыргыдай нэһилиэгин Бочуоттаах олохтооҕо»  ааты иҥэрдилэр. «Нэһилиэк сайдыытыгар кылаатын иһин»  анал бэлиэлэри Быканов В.А, Окоемов Г.Г, Кырбасова П.Д, Наумова О.В. туттардылар. «Илин» бааһынай хаһаайыстыба сал. Кырбасова А.В. хас биирдии тыыл бэтэрээнигэр, сэрии сылларын оҕолоругар истиҥник эҕэрдэлээн туран, биэстии киилэ сибиэһэй ынах арыытын бэлэх уунна.

«Сайдыы» эдэр ыччат түмсүүтэ, «Дайыы» үҥкүү бөлөҕө бэйэлэрин илиилэринэн оҥорбут оҥоһуктарын, сэмэй бэлэхтэрин туттардылар.
Нэһилиэк минньигэс астаах асчыт далбардара, булчут эр хоһууннара булт араас көтөрүнэн, куобах этинэн,  ыһаарыламмыт собонон күндүлээн үөртүлэр.
Сүрүн култуурунай барылын оҥорон, иилээн-саҕалаан «Туску» сынньалаҥ киинин кэлэктиибэ сал. Осипова Г.Н, олохтоох бибилэтиэкэр Николаева Л.Г, олохтоох дьаһалта баһылыга Алексеев Э.Э., нэһилиэк кырдьаҕастарын сэбиэтэ буолан кыттыһан бэрт истиҥник бэлиэтээн аастыбыт.

«Мин сөбүлүүр дьарыгым» быыстапка:

Орто дойду олоҕор утуму салгыыр удьуору ууһатан, олох үтүө үгэстэригэр, үөрүйэхтэригэр такайан, үлэлээн-хамсаан төрөөбүт нэһилиэктэрин чэлгитэн, дьоһун олоҕу олорон кэлбит ытыктыыр кырдьаҕастарбыт, санааларын күүһүнэн тулалыыр дьоҥҥут убаастабылларыгар, сылаас сыһыаннарыгар, тапталларыгар угуттанан этэҥҥэ эрэ буолуннар.

Павлина Кырбасова, 

Бүлүү улууһун Кыргыдай нэһ.