Матаһыыкылга уонна таһаҕас тиэйэр тырааныспарга ОСАГО сыаната уларыйар

Киин баан 2024 сыл сэтинньи 22 күнүнээҕи 6949№-дээх бирикээскэ уларыйыы киллэрбитин таһаарда. Докумуон ааспыт сыл ахсынньы 25 күнүгэр Юстиция министиэристибэтигэр регистрацияламмыта.

Тарыып икки өттүгэр кэҥиир:

• уопсастыбаннай тырааныспарга (троллейбус, трамвай, оптуобус) — 11,57%;
• матаһыыкылга уонна 16 туоннаҕа диэри таһаҕаһы тиэйэр тырааныспарга — 20%.

Бу тырааныспардар кыттыылаах суол саахалыгар ОСАГО толуйуута ночооттоох буолууларыттан итинник дьаһал ылылынна. Уларыйыылар тохсунньу 27 күнүгэр олоххо киириэхтэрэ. Холобур, статистика көрдөрөрүнэн, дьоҕус таһаҕаһы тиэйэр тырааныспар кыттыылаах суол саахалыгар ОСАГО толуйуутун кээмэйэ үксүтэ 400 тыһ. солк. тэҥнэһэр, онуоха матаһыыкыл кыттыылаах суол саахалыгар — 32%-ҥа диэри улааппыт. Онон бу суоппардарга  ОСАГО дуогабарын түһэрсиигэ ыстааһын уларытарга уонна мотуор кыамтатыттан көрөн саҥа коэффициены киллэрэргэ быһаарылынна. Бу көрдөрүүлэр эмиэ страховой бириэмийэ кээмэйигэр дьайыаҕа. Ону таһынан, страховкалааччылар ОСАГО дуогабарын түһэрсиигэ атын омуктарга национальнай тырааныспары ыытар дастабырыанньаларыгар ыйыллыбыт ыстаастарын учуоттуур эбээһинэстэр киллэрилиннилэр. Бу уларыйыылар массыына ыытааччыларга ананар ОСАГО сыанатын баазовай ыстаапкаларын таарыйыахтара суоҕа.

Барыллаан чахчыларынан, 2024 сылга барыта 43,7 мөлүйүөн ОСАГО полиһа оҥоһуллубут, ол эбэтэр урукку сылтан 5,5% элбэх. ОСАГО сыаната ортотунан 2,5%-нан түспүт уонна 7,6 тыһ. солк. тэҥнэспит.