“Муҥха” саҥа 3Д-мульткиинэ 2024 сыл бастакы кыбаарталыгар көстүөҕэ

Саҥа мультипликационнай киинэҕэ кырачаан кыыс үгэс буолбут кыһыҥҥы балыктааһыҥҥа бэйэтин күүһүн холоно сатыыр уонна дьикти үтүлүктэрин абыгар-хомуһугар итэҕэйэр.

«Биһиги билигин “Мунха” диэн кылгас кээмэйдээх иккис 3D-мультипликационнай киинэбит үлэтин түмүктээн эрэбит. Көрөөччүлэр саҥа дьоруойдардаах киинэни 2024 сылга көрөөрү тулуйбакка күүтэллэр. Мухҥа – саха норуотун кыһыҥҥы култууратын дьоһуннаах көстүүтэ, онон биһиги саарбахтаабакка эрэ Саха сиригэр кыһын туһунан  кэллиэксийэбитигэр киллэрбиппит. Бу кэллиэксийэбитигэр “Тымныы оҕуһа” диэн бастакы мультипликационнай киинэбит киирбитэ, көрөөччүлэр олус сөбүлээбиттэрэ”, — диэн “Туундара” анимация устуудьуйатын  дириэктэрин солбуйааччы Анна Борисова санаатын үллэһиннэ.

Мультипиликационнай киинэ оҥоһуллуута “2020-2024 сылларга Саха Өрөспүүбүлүкэтигэр  судаарыстыбаннай уонна официальнай тыллары харыстааһын уонна сайыннарыы” судаарыстыбаннай бырагырааманан үбүлэнэр. “Муҥха” мультипликационнай киинэ 2024 сыл бастакы кыбаарталыгар “Саха” НКиХ көстүөҕэ.

“Туундара” устуудьуйа устубут “Тымныы оҕуһа” бастакы мультипликационнай киинэтэ 2023 сыл муус устарга “Саха” НКиХ көстүбүтэ уонна Торонтоҕа  ImagineNATIVE Film + Media Arts аан дойдутааҕы  бэстибээлгэ “Төрүт норуоттар тылларын харыстааһын” номинацияҕа бириис ылбыта. “Туундара” анимация устуудьуйата – “Үлэ кыбартаала” креативнай кластер резиденэ,  2023 сыллаахха Startup Village стартап куонкуруһугар иккис миэстэни ылбыта.