«МУУС УСТАР»: Бэстибээл амбассадора — блогер Масаха Мэхээс

Саха сирин аграрийдарын түмэ тардарга, сайыннарыыга блогер Масаха Мэхээс төрөөбүт оройуонун  уонна «Эдэр аграрий» оонньуу амбассадорынан буолла.

Мэҥэ Хаҥалас оройуонун дьокутаата, Майатааҕы кыраайы үөрэтэр түмэл дириэктэрэ Масаха Мэхээс Саха сиригэр биллэр блогерынан бэрт соторутааҕыта буолбута.

Саха сирин олохтоохторо эдэр киһи видеоларын кэрэхсии көрөллөр. Видеоларга Масаха Мэхээс бэйэтин хаһаайыстыбатын уонна оҥорон таһаарбыт бородууксуйатын ырыынакка батарытыын туһунан сэһэргиир.

«Былырыын улахан хотону туттубутум уонна көхтөөхтүк сүөһү иитиитинэн дьарыктанабын. Билигин Саха сиригэр сүөһү иитиитин бары ыарахаттарын кытта илэ көрсөбүн. Блогум миэхэ аныгы кэм сүбэлэрин-амаларын кытта атастаһарга, дьону-сэргэни кытта санаа үллэстэргэ кыах биэрэр. Билигин атын пиэрмэрдэри кытта сирэй көрсөн кэпсэтэбин, доҕордоһорго дьулуһабын. Ол иһин «Муус Устарга» кыттабын, — диэн Масаха Мэхээс санаатын үллэстэр. Кини санаатынан, Саха сиригэр аграрийдары кытта коммуникация тиийбэт. «Эдэр аграрий» оонньуу Саха сирин пиэрмэрдэрин кытта сирэй көрсөргө, кэпсэтэргэ, уустук кыһалҕалары быһаарарга кыах үөскэтэр.

Блогер буолуон иннинэ Масаха Мэхээс олоҕун дьарыгын булаары, араас эйгэҕэ үлэлээн боруобаламмыт. Кини санаатынан, ыччат элбэх харчылаах буолууга дьулуһарынан эрэ буолбакка, уопсастыба сайдыытыгар бэйэтин кылаатын киллэрэрэ улахан суолталаах.

Бу иннинэ Масаха Мэхээс тротуар билиитэтин оҥорон таһаарыыга былаастык тобохторун переработкалыыр сыаҕы үлэҕэ киллэрбитэ. Кэскиллээх дьыала билиҥҥитэ дьоҥҥо-сэргэҕэ тобохтору арааран быраҕыы киирэ илигиттэн ситэ сайдыбакка турар. Ол эрээри, инникитин атыылаһыллыбыт мал-сал хайаатар да наада буолуоҕа диэн санаатын түһэрбэт уонна бигэ эрэллээх.

«Эдэр аграрий» оонньуу ыччаты идэҕэ уһуйар, аҕам саастаах дьонтон сүбэ-ама хомуйарга кыах биэрэр. Эдэр ыччакка сайаапкалары биэрэргитигэр, бэстибээлгэ кыттаргытыгар сүбэлиибин!», — диир Масаха Мэхээс. Бу туһунан «Муус Устар» ТГ-ханаал суруйар.