Налимскайга саҥа амбулаториялаахтар

Ил Дархан Айсен Николаев Орто Халыма оройуонугар үлэтинэн тиийэ сылдьан, Налимскайга «Доруобуйа харыстабыла» национальнай бырайыак чэрчитинэн тутуллубут саҥа амбулаторияҕа сылдьан үлэни-хамнаһы билсибитэ. Бу туһунан бүгүҥҥү «Россия 24» ханаал «Вместе с Айсеном Николаевым» биэриигэ көрдөрдүлэр.

Манна даҕатан эттэххэ, доруобуйа харыстабылын бастакы сүһүөх тэрилтэлэрин саҥардыы бырагырааматынан, Орто Халымаҕа Налимскайга, Березовкаҕа, Өлөөкө Күөлгэ амбулаториялар тутуллуннулар.

Налимскайга амбулатория аныгы үйэ ирдэбилигэр эппиэттиир араас наадалаах тэрилинэн, миэбэлинэн хааччыллыбыт. Амбулаторияҕа быраас хоһо, процедурнай, быһыы биэрэр хос, эмтэри харайар кэбиниэт бааллар. Дьон-сэргэ күнүскү станционары, доруобуйаларыгар хааччахтаахтар кэлэллэригэр-баралларыгар пандус баарын сэргээбиттэр.

Ил Дархан Арктика улуустарыгар мэдиссиинэ көмөтө дьоҥҥо кыаллымтыа буоларын ситиһэр туһугар болҕомто уурулларын этэр.