Намҥа 50 сыл бииргэ олорбут ыаллары эҕэрдэлээтилэр

Муус устар 28 күнүгэр гражданскай турук аактатын толорор управление Намнааҕы салаатын мааны саалатыгар 50 сыл бииргэ олорбут ытык-мааны ыаллары эҕэрдэлээтилэр.
Хамаҕатта нэһилиэгиттэн Клара Васильевна уонна Николай Николаевич Протопоповтар уонна Бастакы Хомустаахтан Тамара Тимофеевна уонна Роман Романович Колмогоровтар 50 сыл алаһа дьиэ тэринэн, оҕо-уруу тэнитэн бииргэ олорбуттарын үөрүүлээхтик чиэстээтилэр.

Клара Васильевна уонна Николай Николаевич оҕо эрдэхтэриттэн бииргэ оонньоон, үөрэнэн улааппыттар. Клара Васильевна оскуолатын бүтэрэн баран, фермаҕа ыанньыксытынан үлэлиир, онтон Дьокуускайдааҕы республикатааҕы культурнай-сырдатар училищеҕа үөрэнэн, библиотекарь идэтин баһылыыр. Николай Николаевич оскуолатын кэнниттэн Сэбиэскэй аармыйа кэккэтигэр ытык иэһин толорон кэлэр, автооскуолаҕа үөрэнэн, суоппар идэтин ылар.
1972 с. Клара Васильевнаны Салбаҥ нэһилиэгин библиотекатыгар аныыллар, онон бу сыл күһүнүгэр чугас аймахтарын ыҥыран аҕыйах киһилээх уруу тэрийэллэр. Нөҥүө күнүгэр саҥа холбоспут ыал ДТ тракторынан Салбаҥҥа айанныыр. 1973 с. сааһыгар улахан уоллара төрөөбүтүн кэннэ сокуонунан холбоһоллор.
Салбаҥ нэһилиэгэр 12 сыл олорон, үлэлээн баран, дойдуларыгар Хамаҕаттаҕа дьиэ туттан көһөн кэлэллэр. Ыал ийэтэ «Комсомольскай» совхозка кадровигынан, онтон Хамаҕаттаҕа сэлиэнньэ сэбиэтигэр секретарынан, ыал аҕата «Комсомольскай» совхозка тракториһынан үтүө суобастаахтык үлэлииллэр.
Икки уол оҕолонон, сэттэ сиэн тапталлаах эбэлэрэ, эһэлэрэ төһө да бочуоттаах сынньалаҥҥа олордоллор, нэһилиэк олоҕор көхтөөх кыттыыны ылаллар. Ол курдук, «Күбэй» аҕам саастаахтар общественнай кулууптарын чилиэттэрэ буолаллар. Сайын аайы оҕуруот аһа үүннэрэн, көрөн-истэн оҕолорун, сиэннэрин, аймахтарын, доҕотторун күндүлүүллэр. Иллэҥ кэмнэригэр айылҕаҕа сылдьалларын, балыктыылларын, сир астыылларын сөбүлүүллэр.

Тамара Тимофеевна Нам орто оскуолатын бүтэрэн баран, Дьокуускайдааҕы тыа хаһаайыстыбатын техникумугар үөрэнэн, агроном идэтин баһылыыр. «Нам» совхозка киин биригээдэҕэ техник-нормировщигынан, киин өрөмүөннүүр мастарыскыайга, саппаас чаас ыскылаатын сэбиэдиссэйинэн үлэлээбитэ. Новосибирскайдааҕы тыа хаһаайыстыбатын институтугар диспетчеризация идэтигэр үөрэммитэ. Бүтүн Россиятааҕы нэһилиэнньэ биэрэпиһигэр иккитэ кыттан, грамоталарынан, махтал суруктарынан наҕараадаламмыта. Икки төгүл нэһилиэк сэбиэтигэр депутатынан талыллан бэриниилээхтик үлэлээбитэ.
Роман Романович оскуоланы бүтэрэн, тракторист кууруһугар үөрэммитэ. 1968 сыллаахтан пенсияҕа тахсыар диэри «Нам» совхозка трактористаабыта. Кэлин Бастакы Хомустаах орто оскуолатыгар тракториһынан үлэлээбитэ. Үтүө суобастаахтык үлэлээн, «Москвич» массыына фондатынан, ВДНХ путевканан, «Молодой гвардеец пятилетки» бэлиэнэн наҕараадаламмыта. Коммунистическай үлэ ударнига бочуотунай грамоталарынан, махтал суруктарынан, элбэх сыаналаах бириистэринэн наҕараадаламмыта.
Тамара Тимофеевна уонна Роман Романович икки кыталык кыргыттарын иитэн, үөрэттэрэн, билигин үс сиэн эйэҕэс эбэтэ, эһэтэ буолан дьоллоохтук олороллор. Нэһилиэк киэн туттар сис ыала үүнэр көлүөнэҕэ үтүө холобур буолаллар.

Дьоллоох дьиэ кэргэттэри улуус баһылыга Юрий Слепцов истиҥник эҕэрдэлээтэ, кинилэр үүнэр ыччакка үтүө холобур буолалларын, төрөөбүт түөлбэлэрин, улуустарын туһугар үлэни өрө тутан кэлбиттэригэр махтанан туран, эҕэрдэ суруктары уонна 50 000 солк. сертификаттары бэлэх уунна. Юрий Иннокентьевич анал уураах ылынан, үбүлүөйдээх дьиэ кэргэттэргэ биир кэмнээх  харчынан чиэстиирэ үһүс сылын ситиһиилээхтик уонна үрдүк  таһымнаахтык бэлиэтэнэр. Намнааҕы гражданскай турук аакталарын толорор салалта салайааччытын эбээһинэһин толорооччу Саргылаана Азарова бэйэтин эҕэрдэтин тиэрдэн туран, СР Правительствотын гражданскай турук актатын толорор управление «Дьиэ кэргэн килбиэнэ» бэлиэтин уонна СР Ил Дархана Айсен Николаев эҕэрдэ суругун үөрүүлээх быһыыга-майгыга туттарда. Салгыы улуустааҕы ыччат уонна дьиэ кэргэн политикатын отделын салайааччыта Екатерина Евстафьева, Бастакы Хомустаах нэһилиэгин баһылыга Василий Жирков, Хамаҕатта нэһилиэгин баһылыга Евгений Ушницкий, чиэстэнэр ыалларбыт оҕолоро, аймахтара бэйэлэрин эҕэрдэлэрин тиэртилэр, сэмэй бэлэхтэрин туттардылар.

Бүгүҥҥү үөрүүлээх күҥҥэ киэн туттар ытык-мааны дьиэ кэргэттэрбитигэр истиҥ эҕэрдэбитин тиэрдэбит. Тапталгыт хаһан да уҕараабатын, чэгиэн доруобуйаны, дьолу-соргуну баҕарабыт.

«Нам улууһа» МТ пресс-сулууспата