Салгыы
Намҥа — «Байанай күрэҕэ»

Намҥа — «Байанай күрэҕэ»

Ааптар:
27.03.2023, 11:10
Хаартыска: Нам улууһун дьаһалтата.
Бөлөххө киир:

Бэҕэһээ, кулун тутар 26 күнүгэр, Нам улууһугар Сомоҕолоһуу сылыгар аналлаах, «Нам» совхоз булчуттарын бирииһигэр «Байанай күрэҕэ — 2023» 1-кы Хомустаах нэһилиэгин «Үс бастаах» диэн сиригэр буолан ааста.

Күрэхтэһии тэрийээччилэрэ – «Хомустаах 1-кы нэһилиэгэ» МТ дьаһалтата, улуустааҕы булчуттар уонна балыксыттар уопсастыбалара  уонна тэрийэр хамыыһыйа эрдэттэн мунньахтаан, хаары күртэрэн, күрэх түһүмэхтэрин бэлэмнээн, түһүмэх аайы наадалаах атрибуттары туруорталаан, спонсордары кытта үлэлэһэн, тэрээһин сэргэхтик, үрдүк тэрээһиннээхтик ааста. Кыратыттан, кырдьаҕаһыгар тиийэ элбэх көрөөччү сырытта.
Күн-дьыл, кубулҕаттаах кулун тутар ый буоларынан – күннээх да, былыттаах да буолан ылла, хаардаан да ылла.
Быйылгы күрэххэ барыта 9 нэһилиэк хамаандата көхтөөхтүк күрэхтэстэ: 1 Хомустаах, Үөдэй, Көбөкөн, Салбаҥ, Никольскай, Хамаҕатта, Арбын, Ленскэй, Хатыҥ Арыы.

Тэрээһин үөрүүлээх аһыллыытыгар улуус баһылыга Юрий Слепцов, улуус баһылыгын солбуйааччы Филипп Николаев, 1 Хомустаах нэһилиэгин баһылыга Василий Жирков, Намнааҕы государственнай, экологическай надзор инспектора Семён Эверстов, улуустааҕы булчуттар уонна балыксыттар уопсастыбаларын  салайааччыта Иван Яковлев кыттыыны ыллылар, эҕэрдэ тыллары эттилэр. Юрий Иннокентьевич булчуттары, бэтэрээннэри, булду сэҥээрээччилэри, күрэхтэһээччилэри, көрөөччүлэри, тэрийээччилэри өрөспүүбүлүкэтээҕи  «Байанай күрэҕэр» улуустааҕы хамаанданы сүүмэрдиир күрэхтэһии күнүнэн эҕэрдэлээн туран, Нам улууһугар эҥкилэ суох өр сылларга булчутунан үлэлээбит ытыктыыр, киэн туттар дьоммут ааттарын үйэтитэр сыалтан «Байанай күрэҕэ» сыл аайы улуус нэһилиэктэринэн көһө сылдьан буолуо диэн иһитиннэрдэ. Күрэхтэһээччилэргэ ситиһиилэри баҕарда уонна улуус булчуттарыгар уонна спонсордарга Махтал суруктары туттарда.

Күрэхтэһии уопсай түмүгүнэн:

1 миэстэ – 1 Хомустаах;
2 миэстэ – Ленскэй;
3 миэстэ – Үөдэй.

Кыайыылаахтарга анал бириистэри – «Нам» совхозка өр сылларга кадровай булчутунан таһаарыылаахтык үлэлээбит, ытыктабыллаах дьоммут ааттарыттан оҕолоро, сиэннэрэ уонна үлэлии сылдьар кадровай булчуттар, нэһилиэк дьаһалталара туруорбуттарын үөрүүлээх быһыыга-майгыга туттардылар:

Эллэй Николаевич Константинов – «Нам» совхоз кадровай булчута, тыыл, үлэ, спорт ветерана аатыттан кыыһа Екатерина Бурнашева;
Дмитрий Михайлович Федотов – «Нам» совхоз охотоведа, кадровай булчута, тыыл, үлэ ветерана аатыттан уола Станислав Федотов;
Иван Гаврильевич Николаев – Аҕа дойду Улуу сэриитин ветерана, «Хорсунун иһин», «Германияны кыайыы иһин», «Үлэҕэ килбиэнин иһин» мэтээллэр хаһаайына, РСФСР тыатын хаһаайыстыбатын туйгуна, «Нам» совхоз кадровай булчутун аатыттан сиэнэ Владимир Соловьев;
Павел Гаврильевич Николаев – Аҕа дойду Улуу сэриитин ветерана, 1 Хомустаах нэһилиэгин, Нам улууһун Бочуоттаах гражданина, Коммунистическай үлэ ударнига, үлэ ветерана, «Нам» совхоз кадровай булчутун аатыттан уола Василий Николев;
Роман Гаврильевич Николаев – «1941-1945 сылларга Аҕа дойду Улуу сэриитин кэмигэр килбиэннээх үлэтин иһин», РСФСР Үрдүкү Сэбиэтин «Үлэҕэ килбиэнин иһин», «ССРС норуотун хаһаайыстыбатын ситиһиилэрин иһин» мэтээллэр хаһаайына, «Нам» совхоз промысловига, кадровай булчута аатыттан оҕолоро;
Степан Степанович Куличкин – СӨ тыатын хаһаайыстыбатын туйгуна, СӨ булт хаһаайыстыбатын департаменын Бочуотунай грамотатынан наҕараадаммыт, «Нам» совхоз кадровай булчутун аатыттан уола Степан Куличкин;
Николай Дмитриевич Казанов – Москва куоракка ыытыллыбыт Бүтүн Союзтааҕы булчуттар быыстапкаларын кыттыылааҕа, тыыл, үлэ ветерана, «Нам» совхоз чемпион кадровай булчутун аатыттан кыыһа Луиза Ядреева;
Иван Иннокентьевич Леонтьев – тыыл, үлэ ветерана, күндү түүлээҕи туттарыыга былаанын куруук куоһара толорор, «Нам» совхоз чулуу кадровай булчутун аатыттан уола Филипп Лаврентьев.

Таастаах нэһилиэгиттэн бириистэри туттардылар:

Аргунов Гаврил Гаврильевич – Ыксаллаах быһыы-майгы содулларын туоратыыга ЫБММ мэтээлин хаһаайына, күндү түүлээҕи бултуур кадровай булчут;
Казанов Николай Николаевич – күндү түүлээҕи, бөрөнү бултуур кадровай булчут, СӨ тыа хаһаайыстыбатын министерствотын «Сылгыны үөрдээн иитиини сайыннарыыга кылаатын иһин» бэлиэ хаһаайына.

«Таастаах нэһилиэгэ» МТ олохтоох дьаһалтата (баһылык Егор Лиханов) Анал бирииһи туруорда.

Үөдэй нэһилиэгиттэн бириистэри туруордулар:

Сталин аатынан колхоз кадровай булчуттара Роман Ильич Обутов, Николай Ильич Обутов, Николай Романович Обутов, Михаил Романович Обутов ааттарыттан оҕолоро Татьяна Николаевна, Анна Михайловна, Роман Михайлович Обутовтар;

«Үөдэй нэһилиэгэ» МТ дьаһалтата (баһылык Иван Гаврильев) уонна булчуттарын түмсүүтэ;
Петр Данилович Эверстов – «Нам» совхоз Үөдэй отделениетын чемпион кадровай булчута, тыа хаһаайыстыбатын салаатыгар «Бастыҥ суоппар» анал аат хаһаайынын аатыттан уола Данил Эверстов.

Күрэхтэһии кылаабынай судьуйата, уопсастыба салайааччыта Иван Васильевич Яковлев:

«Нам улууһун булчуттарын  уопсастыбата, бу кэлэр өрөбүллэргэ,  өрөспүүбүлүкэтээҕи  «Байанай күрэҕэ -2023» 2 хамаанданы туруоруоҕа. Хамаандаларга ситиһиилэри баҕарабыт уонна тэрээһини бары бииргэ түмсэн үрдүк таһымҥа ыытыахпыт диэн эрэнэбит!» — диэтэ.

«Нам улууһа» МТ пресс-сулууспа

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
15 июня
  • 16°C
  • Ощущается: 16°Влажность: 82% Скорость ветра: 2 м/с

Сообщить об опечатке

Текст, который будет отправлен нашим редакторам: