Никита Аржаков Саха сирин бастакы бэрэсидьиэнин туһунан документальнай киинэни устуоҕа

Саха сиригэр өрөспүүбүлүкэ бастакы бэрэсидьиэнэ Михаил Николаев олоҕун туһунан документальнай киинэни устуохтара. Сценарийын олоҕун тиһэх күнүгэр Михаил Ефимович бэйэтэ көрөн сөбүлэспит. Бу туһунан Саха сирин норуодунай суруйааччыта, сценарий ааптара Владимир Федоров иһитиннэрэр.

Владимир Федоров кэлиҥҥи ыйдары бастакы бэрэсидьиэн олоҕун туһунан киинэ сценарийдарын бэлэмнээн Михаил Николаевы кытта атаарбыт. Киинэ режиссерунан Никита Аржаков буолуоҕа. Михаил Ефимович олохтон барыан аҕыйах хонук иннинэ эрэ киинэ сценарийын көрбүт, сөбүлэспит.

“Биһиги киинэни Михаил Ефимович төрөөбүт күнүгэр бэлэх оҥорон сэтинньи 13 күнүгэр таһаарар былааннаах этибит. Ол эрээри, киинэ киниэхэ ытык өйдөбүнньүк быһыытынан тахсар буолла. Сарсын Никита Аржаков Эдьигээҥҥэ, Михаил Ефимович иккис дойдутугар барар, киинэни устан саҕалыыр”, — диэн сценарист иһитиннэрдэ диэн Сахафильм суруйар.