Бибилэтиэкэлэргэ Оҕо төрөөбүт тылынан ааҕыытын көҕүлүүр кииннэр үлэлэрэ салҕанар

Билигин СӨ Култуура уонна духуобунай сайдыыга министиэристибэтин көҕүлээһининэн кииннэр ситимнэрин олохтуур үлэ бара турар. Ол курдук, алтынньы ыйын көрдөрүүтүнэн, өрөспүүбүлүкэ бары улуустарыгар уонна Дьокуускай куоракка 400 киин аһыллан үлэлэрин салҕыыллар.

Мантан 5 киин эбээн, эбэнки тылынан ааҕыыга Алдан, Өймөкөөн, Булуҥ, Кэбээйи улуустарыгар арылыннылар. Ол курдук, арыллыбыт кииннэр саха тылын эрэ буолбакка, хотугу аҕыйах ахсааннаах норуоттар тылларын үөрэтиигэ улахан болҕомтону эмиэ ууруохтара.

Аһыллыбыт кииннэр номнуо Оҕо төрөөбүт тылынан ааҕыытыгар, төрөөбүт тылын иҥэриниитигэр, бэйэтин төрөөбүт култууратын билиигэ  сыһыаннаах, араас хабааннаах тэрээһииннэрин ыытан, кыттан саҕалаатылар, ол курдук: Чурапчытааҕы «Төрөөбүт тыл биһигэ» кииҥҥэ «Эбэ ааҕар» дорҕоонноохтук ааҕыы аахсыйалара, «Төрөөбүт тыл ыллыгынан» оҕону саха норуотун үгэстэрин билиһиннэрэр дьарыктар; Уус Алданнааҕы “Сандаар” кииҥҥэ “Бииргэ ааҕабыт” дьиэ кэргэнинэн ааҕыы күрэҕэ; Томпотооҕу кииҥҥэ “Учимся говорить по-якутски!”, “Культура народов Якутии” оҕону төрөөбүт тылынан ааҕыыга уонна култуурабытын кытта билиһиннэрии уруоктары; Өймөкөөннөөҕү кииҥҥэ «Оонньуубут, сайдабыт, элбэҕи билэбит» тэрээһин; Булуннааҕы «Хутар дюгурма» (Светлая тропинка) кииҥҥэ «Гудей дуниэ» эбэнки норуотун фольклорун туһунан билиһиннэрии уруоктар; Алданнааҕы “Эвэды танкаллу” эбэнки тылынан ааҕыы киинигэр «Туос тыылаах эбэнкилэр» кинигэ биһирэмэ о.д.а. араас хабааннаах тэрээһиннэр аһыллыбыт кииннэрбитигэр ыытыллаллар. Ону тэҥэ аһыллыбыт киинэрбигигэр сайын устата ааҕыы лааҕырдара үлэлээбиттэрэ.

Санатан эттэххэ, олунньу 13 күнүгэр, Төрөөбүт тыл, сурук-бичик күнүн бэлиэтиир үөрүүлээх тэрээһинигэр СӨ Бырабыыталыстыбатын бэрэссэдээтэлин солбуйааччыта Сергей Местников «Оҕо төрөөбүт тылынан ааҕыытын тарҕатар бастыҥ киин» өрөспүүбүлүкэтээҕи күрэҕи биллэрбитэ. Күрэх төрөөбүт тылы харыстыыр уонна сайыннарар судаарыстыбаннай бырагыраама чэрчитинэн ыытыллар, уопсай бириис пуондатыгар 5 мөлүйүөн солк. харчы көрүллэр, күрэх олунньу ыйтан сэтинньигэ диэри ыытыллар. Бу күрэххэ сайаапкалары хомуйуу үлэтэ бара турар.

Сахабыт сирин олохтоохторун аһыллыбыт киинэрбит тэрээһиннэригэр өйөөҥҥүт, көхтөөхтүк кыттын диэн ыҥырабыт.