Ньурба донора барытыгар холобур

Муус устар  20 күнэ – Донор национальнай күнэ.

“Биир ньыгыл Арассыыйа»  баартыйа  Ньурбатааҕы олохтоох отделениетын толорооччу сэкирэтээрэ, донор Виктория Степанова туһунан оройуон дьокутааттарын Сэбиэтин бэрэссэдээтэлэ Ньургуйаана Михайлова маннык билиһиннэрэр:

— Ньурба донора барытыгар холобур: маанылаах ийэ, тапталлаах эбээ, спортсмен бэрдэ — улууска биллэр волейболист. Виктория Валериевна Ньурба оройуоннааҕы райсэбиэтигэр 16 сыл үлэлээн кэллэ. Ньурба куоратын Лермонтовскай түөлбэ салайааччыта. Кини аан бастаан донор быһыытынан тохсунньу 23 күнүгэр 2023 сыллаахха хаан туттарбыта. Ол кэнниттэн түөртэ туттарда. Донор бэлиэтииринэн, хаан туттарыыта туһалаах эбит. “Хаан хаачыстыбата тупсар, саҥардыллар. Бастатан туран, киһи олоҕун уһатыыга көмө тугунан да сыаналаммат, туохтааҕар да күндү. Улууспутугар сүүсчэкэ донор баар. Социальнай ситимҥэ анал бөлөхтөөхпүт. Ким баҕалаах хаан туттарыан сөп. Ордук II, III, IV группалаах хааҥҥа наадыйыы баар. Хааны чаастатык туттарбаккын, анал ирдэбиллээх. Хаан туттарыаҥ иннинэ тустаах бэрэбиэркэни ааһаҕын, — диэн кэпсиир Виктория Валериевна.

Бүгүҥҥү бэлиэ күнүнэн Виктория Степанованы уонна Ньурба донордарын итиитик-истиҥник эҕэрдэлиибит! Эһиги дьоҥҥо көмөлөһөр баҕаҕыт атын дьону эмиэ көҕүлээтин, эһиэхэ кытаанах доуруобуйаны, тус олоххутугар дьолу-соргуну баҕарабыт.