Ньурбаҕа оҕо өлүүлээх иэдээн таҕыста

Бэҕэһээ, кулун тутар 31 күнүгэр, Ньурбаҕа чааһынай дьиэҕэ тахсыбыт баһаарга уон саастаах оҕо суорума суолланна. Бу туһунан Саха сирин ЫБММ  иһитиннэрдилэр.

Кириллин уулуссатыгар чааһынай дьиэҕэ баһаар тахсыбытын туһунан иһитиннэрии быыһыыр сулууспаҕа 17.41 киирбит. Баһаарынайдар кэлиилэригэр дьиэ кырыыһата умайа турар эбит. Уот дьиэ мансаардатын, бастакы этээс үрдүн уонна 100 кв.м.иэннээх гарааһы хаппыт.  Уоту умуруорууга 16 баһаарынай, үс тиэхиньикэ үлэлээбит. Баһаар уотунан барар оттук приборуттан тахсыбыт диэн быһаарбыттар. Бу тэрил гарааска турбут эбит. Оҕо өлүүлээх иэдээнинэн борокуратуура бэрэбиэркэтэ саҕаламмыт. РФ холуобунай кодексатын 109  ыст. 1 ч. сэрэҕэ суох буолууттан киһи өлүүлээх иэдээнинэн холуобунай дьыала тэриллибит.

Кэнники биэс ыйга баһаарга оҕо өлүүлээх иэдээннэр тахсаллара хомолтолоох.