Оҕо лааҕырын таһыгар тыатааҕыны көрбүттэр

Алдан оройуонугар баар «Берег дружбы» оҕо лааҕырын таһыгар тыатааҕы сылдьарын лааҕыр үлэһиттэрэ көрбүттэр. Инньэ гынан бүгүн, от ыйын 17 күнүгэр, оҕолор кэлиэхтээхтэрин тохтоппуттар. 

—Лааҕыр салайааччыта айылҕа харыстабылын тэрилтэтигэр сайабылыанньа суруйбута. Хомойуох иһин бу бастакы түгэн буолбатах. Оҕолорго сэрэхтээҕинэн лааҕырга оҕолору олохтууру тохтоттубут. Өскөтүн булчуттар тыатааҕыны суох гыннахтарына, сарсын оҕолору ыҥыртыахпыт, — диэбит. Бу туһунан оройуон үөрэҕин Департаменын салайар Елена Хрущ иһитиннэрбит.

Бэлиэтээн суруйдахха, быйыл тыатааҕыны Томпо, Хаҥалас улуустарыгар көрбүттэрэ. Хаҥалас Хачыкаатыгар 40 саастах дьахтарга ийэ тыатааҕы саба түһэн эчэппитэ. Ону сэргэ, Таатта улууһун Харбалааҕар ыал тиэргэнигэр киирэн аһыы турарын туһунан тарҕаммыта.