Дьахтар эр киһини үстэ халаабыт

Алдаҥҥа оройуоннааҕы ИДьМ салаата иһитиннэрбитинэн, Томмот  олохтооҕуттан сэттэ тыһ.солк. уорбуттар.

Суһал ирдэбил үлэһиттэрэ 29 саастаах уорбаланааччы дьахтары туппуттар. Кини иһитиннэрбитинэн, эмсэҕэлээбит эр киһини кытта хас да буолан бииргэ арыгылаабыттар. Эр дьон аһыы олорон баан каартатын дьахтарга биэрэн баран маҕаһыыҥҥа ыыппыттар. Дьахтар маҕаһыынтан арыгы аҕалан биэрбит, каарталарын төннөрбүт уонна дьиэлээбит. Сотору кэминэн дьахтар эр дьоҥҥо иккистээн кэлбит, утуйа сыталларын көрбүт. Утуйа сытар эр киһи сыттыгар суотабай төлөпүөн сытарын көрөн, мобильный баан сыһыарыы нөҥүө 2000 солк. уорбут. Икки чаас буолан баран, кыбартыыраҕа үһүстээн кэлбит уонна эмиэ икки тыһ.солк.ылбыт, онтон арыый хойутуу 3000 солк. эбии ылбыт. Уорбут харчытын дьахтар тус наадаларыгар туттубут.

Арассыыйа Федерациятын холуобунай кодексатын 158 ыст. 3 ч. «Уоруу» диэнинэн холуобунай дьыала тэриллибит.