Оҕо төрөөһүнүн элбэтиигэ уонна дьиэ кэргэни өйөөһүҥҥэ туһуламмыт дьаһаллар

Олунньу 1 күнүттэн иккис оҕоҕо бэриллэр федеральнай ийэ хапытаала уонна эрэгийиэннээҕи ийэ хапытаала үрдээтэ. Ону сэргэ 2024 сыл тохсунньу 1 күнүттэн ийэ хапытаалын сууматын икки төгүл – 151 690 солкуобайтан 300 000 солк. диэри улаатыннардылар итиэннэ чааһынай олорор дьиэни тутууга сир учаастагын атыылааһын дуогабарынан туһаныы хайысхаларын испииһэгэ кэҥээтэ.

Бу туһунан Ил Түмэн пресс-сулууспата иһитиннэрэр.

Судаарыстыбаннай Дуума бэрэcсэдээтэлэ Вячеслав Володин: «Cудаарыстыба приоритета – бары социальнай эбэһээтэлистибэлэринэн толору хааччыйыы», — диэтэ.

Федеральнай ийэ хапытаалын кээмэйэ 2024 сыл олунньу 1 күнүттэн маннык буолла:

— бастакы оҕоҕо – 630 380,77 солк.;

— иккис оҕоҕо – 833 024,74 солк. эбэтэр 202 643,96 солк., өскөтүн урут бастакы оҕоҕо төлөбүрү ылбыт буоллаҕына.

Аны иккис оҕо төрөөтөҕүнэ эрэгийиэннээҕи ийэ хапытаалын кээмэйэ (РМК на 2) олунньу 1 күнүттэн маннык буолла:

— өскөтүн оҕо 2019 сылга төрөөбүт буоллаҕына – 189 114,24 солк.;

— оҕо 2020 сылтан  бэттэх төрөөбүт буоллаҕына – 249 907,42 солк.

Ил Түмэн социальнай бэлиитикэҕэ, үлэҕэ уонна дьарыктаах буолууга сис кэмитиэтин бэрэссэдээтэлэ Алена Атласова бэлиэтээбитинэн, Саха Өрөспүүбүлүкэтин Баһылыга Айсен Николаев көҕүлээбит бу сокуона 2023 сыл ахсынньытыгар норуот дьокутааттарынан өйөммүтэ уонна Дьиэ кэргэн сыла саҕаланыаҕыттан күүһүгэр киирдэ.

Бу дьаһаллар бары оҕо төрөөһүнүн элбэтиигэ уонна оҕолоох дьиэ кэргэни өйөөһүҥҥэ туһуланаллар.