Оҕолоох ыаллары өйүүр миэрэлэр саҥардыллаллар

2022 сыллаахха Саха сиригэр Ийэ сыла бэлиэтэммитэ. Бу сыл үлэ, социальнай сайдыы министиэристибэтин хайысхатынан, элбэх оҕолоох кыаммат ыаллары өйүүр эбии миэрэлэр ылыллыбыттара.

Холобур, «100 сыл оҕолоро» хапытаал болдьоҕо 2027 сыл бүтүөр диэри уһаабыта. Суумата 110 тыһыынча солкуобайга тэҥнэспитэ уонна ыксаллаах балаһыанньаҕа киирбит ыал бу хапытаалтан ылан, 30 тыһыынча солкуобайы наадатыгар туттар кыахтаммыта.

Оҕону иитэ ылар ыалларга бэриллэр ыйдааҕы төлөбүр суумата икки төгүл үрдээбитэ.

5-тэн элбэх оҕолоох ыаллар дьиэ ылалларыгар, тутталларыгар бэриллэр сэртипикээккэ уочараты суох гынар туһуттан, кэккэ миэрэлэр ылыллыбыттара. Маны тэҥэ, бэйэлэрэ дьиэ туттуон баҕалаах ыалларга төлөбүр  аҥаарын уочарата суох биэрэр туһунан  миэрэ ылыллыбыта.

Элбэх оҕолоох ыалларга босхо бэриллэр сир учаастагыттан аккаастанар буоллахтарына, 200 тыһыынча солкуобайы уу харчынан биэрэллэр.

Өрөспүүбүлүкэтээҕи ийэ хапытаалын суумата икки төгүл үрдээн, 300 тыһыынча солкуобайга тэҥнэстэ. 25 саастарыгар диэри аан бастаан ыал буолбут эдэр дьон 50 тыһыынча солкуобайы ылаллар.

— “100 сыл оҕолоро” хапытаалы, федеральнай Ийэ хапытаалын, үһүс оҕо төрөөтөҕүнэ бэриллэр 450 тыһыынча солкуобайы ылан туһаммыппыт. Өрөспүүбүлүкэтээҕи ийэ хапытаалын туһана иликпит, быйылгыттан Ил Дархан көҕүлээһининэн, суумата икки төгүл үрдээн, 300 тыһыынча солкуобай буолбутун олус үөрэ иһиттибит. Элбэх оҕолоохторго сир учаастагын биэрбиттэрэ эрээри, ыраах, уота-суола суох буолан, харчынан толуйууну, 200 тыһыынча солкуобайы ылбыппыт. Биһиги наар ипотекабытын саба охсор дьүккүөннээхпит. Ону тэҥэ, биир кэлим босуобуйа аҥаарын ыларбыт дьиэ кэргэн бүддьүөтүгэр төһүү буолар, — диэн 5 оҕолоох эдэр ыал ийэтэ Айталина Петрова санаатын үллэстэр.