Ойоҕун тылын истибэккэ киирэн биэрбит

Саха сиригэр олохтоохтор харчыларын суйдуур түөкүннээһин тохтообот. Биир маннык угаайыга Алдан оройуонун хачыгаара киирэн биэрбит.

Биир күн киниэхэ баантан эрийбиттэр уонна кини аатыгар 500 тахса тыһыынча суумалаах кирэдьиит оҥоһуллан эрэрин туһунан сэрэппиттэр. Түөкүттэр кини аатыгар кирэдьиит оҥорботторун туһугар саҥа кирэдьиит оҥотторон атын счекка кистииргэ сүбэлээбиттэр. Эр киһи баан үлэһитэбин дэммит киһиэхэ итэҕэйэн тугу этэрин толорон испит. Онуоха хачыгаар ойоҕо түөкүттэр эрийэллэрэ буолуо диэн эрин кэпсэтиитин тохтото сатаабыт. Эр киһи ону истибэтэх. Ол түмүгэр 700 тыһыынча солкуобайы кирэдьиит ылан түөкүттэргэ ыыппытын өйдөөбөккө хаалбыт.

Өскөтүн, баантан, полицияттан, атын араас тэрилтэлэртэн эрийдэхтэринэ, эһиги кимиэхэ даҕаны каартаҕыт нүөмэрин, пааспаргыт дааннайдарын, төлөпүөҥҥүтүгэр кэлбит СМС-иһитиннэриини ыытар, этэр эбээһинэскит суох. Түөкүттэргэ киирэн биэримэҥ!