Олорор сири-уоту тупсарыыга Бүтүн Арассыыйатааҕы куоластааһыҥҥа Саха сирин 21 тыһыынча олохтооҕо кытынна  

Бу дьыл кулун тутар 22 күнүнээҕи туругунан 2025 сылга тупсаҕай оҥоһуллуохтаах уопсастыбаннай сири-уоту талыыга Бүтүн Арассыыйатааҕы куоластааһыҥҥа 14.gorodsreda.ru саайтынан киирэн Саха сирин 21600 олохтооҕо куоластаата.

“Куоракка эрэ буолбакка, тыа сирдэригэр дьон түмсэр сирдэрин тупсаҕай гына оҥоруу дьоһун суолталаах боппуруоһунан буолар. Дьон олоҕо-дьаһаҕа тупсара олус үчүгэй, маннык эйгэ элбиирин туһугар салгыы үлэлиэхпит”, — диэбитэ Саха сирин баһылыга Айсен Николаев.

Быйыл куоластааһын кулун тутар 15 күнүттэн муус устар 30 күнүгэр диэри ыытыллар. Саха сирэ 31 нэһилиэнньэлээх пууҥҥа 67 эбийиэги торумнуур.

Хайдах куоластыахха?

1. https://14.gorodsreda.ru/objects саайтка киирии;
2. Госөҥө нөҥүө аккауҥҥар бэлиэтэн;
3. Нэһилиэнньэлээх пууну уонна эбийиэги тал.

14 саастарыттан ыла куоластыахтарын сөп.

Бүтүн Арассыыйатааҕы куоластааһыҥҥа Саха сирэ 2018 сылтан кыттар. Бу кэм устата 68 уопсастыбаннай миэстэ уонна  144 тиэргэн бырайыагын олоххо киллэрдилэр. Ол курдук, Дьокуускайга Таалай күөлү, Покровскай кытылын, Орто Халымаҕа киин болуоссаты, Ньурбаҕа Сергей Васильев аатынан парканы, Жатайга киин болуоссаты тупсардылар.

Сыл аайы эбийиэктэр ахсааннара элбээн иһэр. 2018 с. 9 сайаапка этэ, 2023 сылга – 50 буолбута. Оттон быйыл 67 киирдэ.

Бүтүн Арассыыйатааҕы куоластааһыҥҥа кыайыы бырайыактары федеральнай үбүнэн үлэҕэ киллэрэргэ көмөлөһөр. Онон “Дьиэ-уот уонна куорат эйгэтэ” нацбырайыак “Тупсаҕай куорат эйгэтин тэрийии” федеральнай бырагырааматынан оҥоһуллуохтаах эйгэлэри онлайн-куоластааһынынан быһаараллар.

Куоластааһын түмүгэ бу федеральнай бырайыак порталыгар тахсыаҕа. Элбэх куолаһы ылбыт эбийиэктэри 2025 сылга тупсаҕай гына оҥоруохтара.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата