Оҥхойдор оскуола тутуутун туруорсаллар

Саха Өрөспүүбүлүкэтин ситэриилээх былааһын уорганнарын, үгэс буолбут, 2023 сыллаах үлэлэрин-хамнастарын отчуоттуур бастакы күнүн үлэтин бастакы бөлөх Оҥхой нэһилиэгэр түмүктээтэ.

Бырабыыталыстыба отчуота өрөгөй ырыанан аһылынна. Ол кэнниттэн Үөһээ Бүлүү улууһун саҥа баһылыга Валерий Николаев бэҕэһээ улууска буолбут, икки оҕо өлүүлээх алдьархай тахсыбытынан, тохтобул биллэрэн кэриэстээн ааһарга ыҥырда.
Салгыы СӨ экэниэмикэҕэ миниистирэ Петр Попов Саха сирин социальнай-экэнэмиичэскэй сайдыытын, ааспыт сыллаах үлэтин-хамнаһын, ситиһиитин туһунан сүрүн дакылааты оҥордо.

Оскуола дириэктэрэ Савва Тихонов саҥа оскуола тутуллуутун туруоруста. Онуоха Үөрэх министиэристибэтин испиэһэгэр 74 сылдьарын, онон билиҥҥитэ сүбэлэһэн, бырайыагын оҥоттордохторуна арыый эрдэ тутуллуон сөп диэн хоруйдаатылар. Биир уустук боппуруоһунан, элбэх өҥөнү оҥорор култуура уонна успуорт киинигэр, хас даҕаны араас тэрилтэ баар эрээри, муоста сууйааччы уонна харабыл штата тиийбэтин эбии көрөллөрүгэр туруорустулар. Аны улахан успуорт саалатыгар инструктар наадатын эттилэр. Бөлөҕү салайааччы Петр Попов Экэниэмикэ уонна Успуорт министиэристибэлэригэр үөрэтэн көрөн, быһаарар суолу тобулалларыгар боротокуолга киллэттэрдэ.

Нэһилиэк ытык кырдьаҕаһа Нина Варламова маннык элбэх састаабынан бырабыыталыстыба отчуоттуур бөлөҕө кэлбититтэн, Саха сирин сайдарыгар үлэ-хамнас барарын истэн үөрбүтүн эттэ. Саҥа баһылыкка үрдүк таһаарыылаах үлэни баҕарда.
Бэтэринээр Алексей Егоров байыаннай дьайыыга сылдьар уолаттар тустарынан киэҥ араҥаҕа таһаарар сиэрэ суоҕун, уолаттары харыстыах тустаахтарын эттэ. Кини өссө ынах сүөһүнү субсидия харчытын ылаары сайын ньирэйин кытары ыабакка ыыталлара сыыһатын эттэ.

Тыа хаһаайыстыбатын исписэлииһэ Антонина Алексеева бэйэтин тус оборудованиетын туһанан үлэлиирин, уопсайынан, баазабай-тэхэньиичэскэй хааччыйыы баар буолуохтааҕын туруоруста. Сэлээркэ, бэнсиин сыаната үрдүү турарын эттэ.

Нэһилиэк дьаһалтатын исписэлииһэ Мария Константинова байыаннай дьайыыга барбыттарга, олохторун толук уурбуттарга, билиэн түбэспиттэргэ реестр чопчу оҥоһуллар дуо диэн ыйытта.

Сынньалаҥҥа олорор Вера Алексеева саамай улахан кыһалҕанан биэлсэр наадатын, 2009 с. оҥоһуллубут суол алдьанан бүппүтүн, өрөмүөн ыытыллыахтааҕын туруоруста. Нэһилиэк олохтоохторо Бүлүү өрүһү туоруур муоста, сибээс, уот мөлтөҕүн, оскуола тутуллуутун кыһалҕаларын, арыы собуота үлэлээбэтин этиннилэр.
Отчуоттуур бөлөх чилиэннэрэ оҥхойдор олус көхтөөхтөрүн, элбэх боппуруоһу туруорсалларын бэлиэтээтилэр, үс чаас устата бары ыйытыыларга хоруйдаатылар.
Оҥхой нэһилиэгин олохтоохторо быйылгы бырабыыталыстыба отчуотун биһирииллэрин эттилэр.

Ааптар хаартыскаларга түһэриитэ