Айсен Николаев Платон Ойуунускай пааматынньыгар сибэкки дьөрбөтүн уурда

Бүгүн, муус устар 27 күнүгэр, Өрөспүүбүлүкэ күнүгэр Ил Дархан Айсен Николаев судаарыстыбаннай диэйэтэл Платон Ойуунускай пааматынньыгар сибэкки дьөрбөтүн уурда.

«Бүгүн биһиги биллэр судаарыстыбаннай диэйэтэллэри — Платон Ойуунускайы, Максим Аммосовы, Исидор Бараховы уонна кинилэри кытта бииргэ үлэлээбит дьону ахтар-саныыр, махтанар күммүт. Кинилэр эр санаалара, тулуурдара, дойдуларыгар тапталлара уонна норуоттарын туһугар эппиэтинэстэрэ Саха сирэ автономнай өрөспүүбүлүкэ буоларын ситиһэн, улахан уларыйыылары оҥорбута», — диэн Айсен Николаев эттэ.

Үөрүүлээх тэрээһиҥҥэ сүрүн федеральнай инспектор Евгений Корнеев, Ил Түмэн бэрэссэдээтэлин бастакы солбуйааччы Александр Жирков, Дьокуускай куорат баһылыга Евгений Григорьев, Арассыыйа Дьоруойдара Александр Колесов уонна Игорь Юргин, бырабыыталыстыба чилиэннэрэ, норуот дьокутааттара, Дьокуускай куорат Дууматын дьокутааттара, байыаннай дьайыы кыттыылаахтара, Уопсастыбаннай палаата чилиэннэрэ, ыччат уонна куорат олохтоохторо кытыннылар.