Онкомаркерга 515 киһи хаанын бэрэбиэркэлэттэ

Ыам ыйын 24-25 күннэригэр өрөспүүбүлүкэ киин куоратын SMART-бибилэтиэкэтигэр Дьокуускайдааҕы онкологическай диспансер «Биир ньыгыл Арассыыйа» баартыйаны кытары бииргэ ыыппыт аахсыйаларын түмүгэ таҕыста. Ол туһунан «Биир ньыгыл Арассыыйа» баартыйа пресс-сулууспата иһитиннэрэр.

Аахсыйа тэрийээччитэ, «Цифровая Россия» бырайыак эрэгийиэннээҕи куратора Баир Дамдинжапов кэпсээбитинэн, тэрээһин кэмигэр онкомаркерга барыта 515 киһи хаанын бэрэбиэркэлэтэ туттарбыт. Аахсыйа кыттыылаахтара сорохторо, номнуо SMS-нөҥүө түмүктэрин туттулар. Тестирование түмүгүнэн 16 киһи эбии чинчийиини барарга Дьокуускайдааҕы онкологическай диспансерга ыҥырылыннылар.

Санатан эттэххэ, мэдиссиинэҕэ утумнаахтык көрдөрүү уонна профилактическай миэрэлэр ыарыыны эрдэ буларга уонна ону эмтииргэ көмө буолаллар.