Оренбург уобалаһын олохтоохторугар гуманитарнай көмөнү оҥоруу салҕанар

Киин куоракка халаан уутуттан эмсэҕэлээбит Оренбург уобалаһын олохтоохторугар гуманитарнай көмөнү хомуйуу пуунун үлэтин салҕыыр.

Саха сиригэр муус устар 8-17 күннэригэр диэри ыытыллар аахсыйаны үлэ кэлэктииптэрэ, урбаанньыттар, Дьокуускай куорат олохтоохторо көхтөөхтүк өйүүллэр. Бүгүн гуманитарнай көмөнү хомуйуу пуунугар СӨ дьаһалтатын уонна бырабыыталыстыбатын салайааччыта Георгий Михайлов сырытта.

«Билигин сааскы халаан уутуттан дойду кэккэ эрэгийиэннэригэр, ол иһигэр Оренбург уобалаһыгар хайдах быһыы-майгы үөскээбитин туһунан бары бэркэ диэн билэбит. Кылгас кэм иһигэр «Биир Ньыгыл Арассыыйа» баартыйа көмөтүнэн Дьокуускайга сааскы халаан уутуттан эмсэҕэлээбиттэргэ гуманитарнай көмөнү оҥоруу пууна тэриллибитэ. Биллэн турар, Саха сирин олохтоохторо күн бүгүн көмөнү оҥороллоро үөрдэр», — диэн Георгий Михайлов бэлиэтээтэ.

Эмсэҕэлээбиттэри өйөөһүҥҥэ Дьокуускайдааҕы «Академия детства» 8 №- дээх оҕо уһуйаанын педагогическай кэлэктиибэ кыттыста. «Саха сирин олохтоохторо маннык алдьархай быһылааннартан хаһан да туора турбат этилэр. Бу да сырыыга туора туран хаалбаппыт, күүстээх көмөнү оҥоробут. Бары үөрэх тэрилтэлэрин, үөрэх тиһигин үлэһиттэрин аахсыйаҕа холбоһон, дьоҥҥо көмөлөһөргө бэйэҕит кылааккытын киллэрэргитигэр ыҥырабын», — диир уһуйаан сэбиэдиссэйэ Анна Федорова.

Ону кытта бүгүн көмөлөһөөччүлэр ортолоругар Федоровтар дьиэ кэргэттэрэ араас малы-салы хомуйан ыыттылар. «Халаан уутуттан эмсэҕэлээбит Оренбург уобалаһын олохтоохторугар гуманитарнай көмө оҥоһулларын туһунан  эрдэ истибиппит. Биһиги бэйэбит кылааппытын киллэрэргэ уонна көмөнү оҥорорго быһаарынныбыт. Сахабыт сирин дьоно-сэргэ көхтөөхтүк көмөнү оҥоруохтара уонна биһиги курдук ыалынан кытта көмөлөһүөхтэрэ диэн эрэнэбит», — диэн дьиэ кэргэн аҕа баһылыга Александр Федоров кэпсээтэ.

Гуманитарнай көмөнү хомуйууга олохтоох урбаанньытар эмиэ кытталлар. «Көмүлүөк» генеральнай дириэктэрэ, «Сделано в Якутии» урбаанньыттар Ассоциацияларын бэрэссэдээтэлэ Ольга Григорьева иһити-хомуоһу, о.д.а малы-салы аҕалла. «Биһиги көхтөөх урбаанньыттар бу аахсыйаҕа кыттыһарга быһаарынныбыт уонна бары кыттыһалларыгар ыҥырабыт. Урут санаатахха, маннык балаһыанньа Ленскэйгэ тахсыбытын өйдүүбүт. Мин санаабар, урбаанньыттар аахсыйаҕа хайаатар да кыттыһыахтаахтар», — диэтэ Ольга Григорьева.

Санатан эттэххэ, «Биир Ньыгыл Арассыыйа» баартыйа Саха сиринээҕи салаатын исполкомун кытта баартыйа уопсастыбаннай өйөбүлүн ыстаабыгар нэһилиэнньэттэн гуманитарнай көмөнү хомуйууну тэрийбитэ. Көмөнү ылыы пууна 8:00-20:00 чаастан үлэлиир. Аадырыһа: Дьокуускай к., Курашов уулуссата, 24 дь., 405 кэб. Билсэр төл.: 8 (4112) 42-14-21.

Сааскы халаан уутуттан эмсэҕэлээбиттэргэ «Российский Красный Крест» анал счету аста. Баан реквизиттэрэ:

Наименование: ОРЕНБУРГСКОЕ ОБЛАСТНОЕ ОТДЕЛЕНИЕ ОБЩЕРОССИЙСКОЙ ОБЩЕСТВЕНННОЙ ОРГАНИЗАЦИИ «РОССИЙСКИЙ КРАСНЫЙ КРЕСТ»

Номер счёта: 40703810029250000197 ОГРН: 1025600002636

ИНН/КПП: 5610031626/561001001

Банк: ФИЛИАЛ «НИЖЕГОРОДСКИЙ» АО «АЛЬФА-БАНК»

Корреспондентский счёт: 30101810200000000824

БИК: 042202824

Назначение платежа: Благотворительное пожертвование на помощь пострадавшим от паводков в Оренбургской области в 2024 г.