Оскуолаларга Эр санааланыы уруоктара ыытылыннылар

Уус Алдаҥҥа Суотту орто уонна Хоноҕор сүрүн оскуолаларыгар Эр санааланыы уруоктара ыытылыннылар.

Олунньу 15 күнүгэр Афганистан судаарыстыбатыттан Сэбиэскэй Сойуус сэбилэниилээх күүстэрин таһаарбыта быйыл 35 сылын туолла. Бу бэлиэ күн Суотту орто уонна Хоноҕор сүрүн оскуолаларыгар Эр санааланыы уруоктара ыытылыннылар. Оскуола үөрэнээччилэрэ 1985-1987 сс. Афганистан сэриитин кыттыылааҕа, СӨ баһаарынай сулууспатын туйгуна, бэтэрээнэ Черкашин Семен Васильевиһы, 2014, 2016 сс. икки төгүл Хотугу Кавказка полиция этэрээтин салайан ытык иэһин толорбут полиция подполковнига, бэтэрээнэ Портнягин Гаврил Лазаревыһы уонна 2005-2006 сс. Чечня өрөспүүбүлүкэтигэр бойобуой дьайыыларга кыттыыны ылбыт, билигин полиция бэтэрээнэ старшай лейтенант званиелаах Бубякин Никита Васильевыһы кытта көрүстүлэр.
Оҕолор байыаннай кэм мүччүргэннээх түгэннэрин болҕойон иһиттилэр, үгүс ыйытыыларыгар хоруйдары ыллылар. Армия олоҕор тулхадыйбат дьиссипилиинэ, бэрээдэк, бойобуой сорудаҕы толорууга дьулуур ирдэнэрин иһиттилэр.
Суотту нэһилиэгэр ыччаты, үүнэр көлүөнэни төрөөбүт дойдуга бэриниилээх буолуу, сомоҕолоһуу тыыныгар иитэр хайысхалаах тэрээһиннэр Суотту, Хоноҕор оскуолаларын, Уус Алданнааҕы техникум, «Доҕордоһуу» музейын, олохтоох бибилэтиэкэлэр тэрээһиннэринэн тиһигин быспакка ыытыллаллар.

Раиса Черкашина,

бибилэтиэкэр, Суотту