#ПозывнойКультура: Саха сиригэр байыастары үйэтитиигэ пуонда тэриллиэҕэ

Олунньу 18 күнүгэр СӨ Култуураҕа уонна духуобунай сайдыыга министиэристибэтин, СӨ Аҕа дойду буойуттарын дьиэ кэргэттэрин кэмитиэтэ, «Саха сирэ, эйигин кытта!» уопсастыбаннай хамсааһын уонна СӨ Национальнай архыыба байыаннай дьайыы кыттылаахтарын өйүүр сыалтан үс өрүттээх сөбүлэһиигэ илии баттаатылар. Көрсүһүү СӨ Култуураҕа уонна духуобунай сайдыыга миниистирэ Афанасий Ноев кыттыылаах министиэристибэҕэ ыытылынна.

Сөбүлэһиини түһэрсиигэ Култуураҕа уонна духуобунай сайдыыга миниистирэ Афанасий Ноев, СӨ Аҕа дойду буойуттарын дьиэ кэргэттэрин кэмитиэтин салайааччыта Марина Бахилина, «Саха сирэ, эйигин кытта!» уопсастыбаннай хамсааһын бэрэссэдээтэлэ Анна Ефимова, СӨ Национальнай архыыбын дириэктэрэ  Петр Румянцев кыттыыны ыллылар.

Сөбүлэһии сүрүн сыалынан дьоруойдары үйэтитии,  кинилэр хорсун быһыыларын туһунан иһитиннэриилэри хомуйуу уонна тиһиккэ киллэрии, ону тэҥэ кэнчээри ыччакка анаан архыып баазатын тэрийии буолар. СӨ Национальнай архыыба бу хайысхаҕа көхтөөхтүк үлэлиир — докумуоннары, хаартыскалары, суруктары уонна байыаннай дьайыы кыттыылаахтарын кытта сибээстээх атын матырыйааллары хомуйар.

«Бу сөбүлэһии устуоруйаны үйэтитиигэ сыаллаах дьоһун хардыынан буолар. Биһиги Ийэ дойдубутун көмүскүүр байыастарбыт ааттарын үйэтитиэх тустаахпыт! Манна Национальнай архыып матырыйааллары эрэллээхтик араҥаччылыа, оттон уопсастыбаннай тэрилтэлэр ураты туоһу матырыйааллары хомуйарга көмөлөһүөхтэрэ», -диэн Афанасий Ноев бэлиэтээтэ.

«Биһиги байыастарга анаммыт анал пуонда тэриллиитин үлэтин саҕалаабыппыт. Бу докумуоннар эрэ буолбакка, тыыннаах туоһулар суруктара, хаартыскалара, ахтыылара бааллар. Ити барыта биһиги устуоруйабыт ураты кэрчигинэн буолуоҕа», — диэн Петр Румянцев санаатын үллэһиннэ.

Бу түгэн судаарыстыбаннай, уопсастыбаннай тэрилтэлэр уонна архивистар икки ардыларыгар сибээһи бөҕөргөтүүгэ өссө биир төһүү хардыынан буолла, чуолаан култуура  тэрилтэлэринэн биллэриллибит Устуоруйа үйэтитиитин сылыгар ордук суолталанар, диэн СӨ Национальнай архыыба суруйар.