Саахса управлениетын салайааччытын солбуйааччы Туйаара Такасаева араадьыйа эпииригэр кыттыаҕа

Сарсын, олунньу 3 күнүгэр, 13 чаас 05 мүнүүтэттэн “Саха” НКИХ  “Тэтим” араадьыйатын эпииригэр “Былааһы кытта кэпсэтии” биэриигэ  СӨ Бырабыыталыстыбатын иһинэн Гражданскай турук аактатын толорууга управлениетын салайааччытын солбуйааччы Туйаара Револьевна Такасаева кыттыаҕа.

Кини тустаах управление 2022 сыллааҕы сүрүн үлэтин түмүктэрин, саҥа сыл соруктарын билиһиннэриэҕэ. Араадьыйаны истээччилэргэ “Госөҥө” порталын туһаныы, чуолаан, күннээҕи олох-дьаһах балаһыанньаларынан түмүллүбүт супер-сервиһинэн туһаныы туһунан кэпсиэҕэ.  Туйаара Револьевна “Мои документы” Элбэх өҥөнү оҥорор киин көмөтүнэн ылыахха сөптөөх өҥөлөр тустарынан сырдатыаҕа. Эпиир кэмигэр киэҥник тарҕаммыт уонна сэдэх ааттары регистрациялааһыҥҥа, 50 уонна онтон элбэх сыл бииргэ олорор кэргэнниилэри биһирээһин, “Золотые семьи Якутии” кинигэни таһаарыы туһунан ыйытыыларга хоруйдуоҕа.

“Былааһы кытта кэпсэтии” биэрии эпиирин кэмигэр ыйытыыларгытын студияҕа маннык төлөпүөннэринэн биэриэххэ сөп: 8 (4112) 32-00-66, 32-11-66.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата