Саха Өрөспүүбүлүкэтин Ил Дархана Айсен Николаев Арассыыйа күнүнэн эҕэрдэлиир

Ытыктабыллаах Саха сирин олохтоохторо!

Саха Өрөспүүбүлүкэтин салалтатын уонна тус бэйэм ааппыттан биһиги судаарыстыбабыт сүрүн бырааһынньыгынан – Арассыыйа күнүнэн эҕэрдэлиибин!

1990 сыл бэс ыйын 12 күнүгэр Судаарыстыбаннай суверенитет туһунан декларация ылыллыаҕыттан Аҕа дойдубут устуоруйатыгар саҥа түһүмэх кэм саҕаламмыта. Онтон ыла бу күн биһиги Ийэ дойдубут сүүс араас омуктаах норуотун биир санааланыытын уонна сомоҕолоһуутун, үйэлээх үгэстэрин уонна духуобунай сыаннастарын кэрэһилиир.

Бүгүн биһиги, Арассыыйа Федерациятын 89 субъегын олохтоохторо, дойдубут инники кэскилин туһугар эппиэтинэспитин өйдөөн туран, бу бырааһынньыгы бэлиэтиибит. Бүгүҥҥү уустук кэмҥэ Ийэ дойдубут модун кыаҕын бөҕөргөтүү кыайыы дьыалатыгар хас биирдиибит киллэрэр кылаатыттан тутулуктаах. Аҕа дойдуну неонацистартан көмүскээһиҥҥэ Саха сирэ дьоһун көмөнү оҥорор.

Арассыыйа күнүгэр Дьокуускай куоракка “1-Боотур” саха доброволецтарын этэрээттэрин хамандыыра, Арассыыйа дьоруойа Александр Колесовы уруйдуурбут ураты суолталаах. Ийэ дойдуга тапталларын, хорсуннарын тылынан эрэ буолбакка, кыргыһыы хонуутугар бигэргэтэр биир дойдулаахтарбытынан киэн туттабыт. Биһиги тутааччыларбыт, миэдиктэрбит, волонтердарбыт Донбааска бэйэлэрин харыстаабакка үлэлии сылдьаллар. Өрөспүүбүлүкэбит бары муннуктарыттан тэрилтэлэр, урбаанньыттар, олохтоох дьон-сэргэ ис сүрэхтэриттэн биһиги байыастарбытыгар, кинилэр дьиэ кэргэттэригэр көмөлөһөллөр.

Биһиги Арассыыйа судаарыстыбаннаһын уонна экэнэмиичэскэй кыаҕын бигэ тирэҕин быһыытынан өрөспүүбүлүкэбитин салгыы сайыннарыыга айымньылаахтык үлэлиэхпит. Саха сирэ урут да, кэнэҕэскитин да судаарыстыба бигэ тыылынан, эрэллээх эркининэн буолуоҕа. 2022 сыл түмүгүнэн өрөспүүбүлүкэ бырамыысыланнай оҥорон таһаарыы тэтиминэн дойдуга ахсыс, оттон Уһук Илиҥҥэ бастакы миэстэлээх.

Инникитин биһиги дойдубутун, улуу Арассыыйа бары эрэгийиэннэрин киэҥ кэскил күүтэр!

Бары тургутуулары чиэстээхтик туорааммыт, былааннаабыппытын барытын олоххо киллэриэхпит диэн бигэтик эрэнэбин.

Күндү доҕоттор! Эһиэхэ саҥа кирбиилэри уонна айар-тутар үлэҕитигэр ситиһиилэри, чэгиэн доруобуйаны уонна уҕараабат эрчими, эйэлээх халлааны уонна уйгулаах олоҕу баҕарабын! Арассыыйа күнүнэн!

Саха Өрөспүүбүлүкэтин Ил Дархана Айсен Николаев.