Саха сирэ Докучаевскай куоракка 65 тутууну чөлүгэр түһэриэ

Саха сирэ шефтэһии бэрээдэгинэн көмө оҥорор Докучаевскай куоракка 65 эбийиэги өрөмүөннүүр былааннаах, олортон 53-һэ — дьон олорор дьиэтэ. Тохсунньуга Донецкай өрөспүүбүлүкэҕэ Саха сириттэн өрөспүүбүлүкэ постпреда Андрей Федотов салалтатынан тэрийэр бөлөх айаннаабыта. Докучаевскай куоракка тиийэн оҥоһуллуохтаах үлэ былаанын таҥмыттара.

Үгүс дьиэҕэ түннүктэри уларытыахтара, 4 дьиэ бүтүннүү өрөмүөннэнэрэ ирдэнэр. Бэрт элбэх сэрииттэн эмсэҕэлээбит дьиэ Центральнай диэн ааттаах киин уулуссаҕа турар. Маны таһынан Саха сирин тутааччылара паарканы, Култуура дыбарыаһын, успуорт киинин, балыыһаны уонна 4-с №-дээх оскуоланы оҥоруохтара.

Докучаевскай 1912 сыллаахха куорат аатын сүкпүт, ол иннинэ Еленовские Карьеры диэн бөһүөлэк эбит. Куоракка биллиилээх геолог Василий Докучаев аатын иҥэрибиттэр. Докучаевскай сүрүн үлэлиир тэрилтэтинэн флюс уонна доломит оҥорор кэмбинээт буолар. ССРС кэмигэр дойдуга ирдэнэр флюс 60% манна оҥоһуллан тахсара.