Саха сирэ социальнай тутууларга — инники күөҥҥэ

Саха сирэ олорор дьиэни тутууга Уһук Илин уокуругун эрэгийиэннэригэр иккис көрдөрүүнү ситиһэн, инники күөҥҥэ сылдьар.

Бүгүҥҥү күҥҥэ 196 элбэх кыбартыыралаах дьиэ тутуута ыытыллар. Үгүс социальнай эбийиэк национальнай бырайыак чэрчитинэн тутуллар. Бу туһунан  Саха сирин тутуу комплексыгар үлэлиир тэрилтэлэр салайааччыларын киэҥ ыҥырыылаах мунньаҕар СӨ Бырабыыталыстыбатын бэрэссэдээтэлин бастакы солбуйааччы Кирилл Бычков иһитиннэрдэ.

— Былырыын биһиги 45 эбийиэги олоххо киллэрбиппит. 2766 миэстэлээх  11 оскуола тутулунна, 205 миэстэлээх  2 уһуйаан, 11 култуура эбийиэгэ, 2 – доруобуйа харыстабылын эбийиэгэ,  11 – успуорт уонна 1 социальнай харалта дьиэтэ. Бүгүҥҥү күҥҥэ 123  социальнай эбийиэк тутуллар. Онтон 33-һэ быйыл үлэҕэ киириэҕэ, — диэн бэлиэтээтэ салайааччы.

Мунньах кыттыылаахтара  тутуу матырыйаалларынан хааччыллыы уонна каадыр боппуруостарын олохтоохтук дьүүллэстилэр.