Саха сирэ “Уһук Илин уулуссатыгар” хотугу итии сайыны аҕалыа
![](https://sakha-sire.ru/wp-content/uploads/2024/07/forum2-1060x596.png)
Балаҕан ыйын 3-8 күннэригэр IX Илиҥҥи экэнэмиичэскэй пуорум чэрчитинэн ыытыллар “Уһук Илин уулуссата” быыстапкаҕа Саха сирин экспозицията туруоҕа, манна биһиги өрөспүүбүлүкэбит култуурата, үгэстэрэ, олоҕо-дьаһаҕа, туризмы уонна инвестицияны тардар кыаҕа көрдөрүллүөҕэ.
“Пуорумҥа араас дойдулартан тыһыынчанан дьоннор кэлэллэр. Кинилэртэн үгүстэрэ биһиги хоту баар сирдэрбитин билбэттэр. Манна кинилэр Владивостоктан тэйбэккэ, Саха сирин кэрэ айылҕатын көрөр кыахтаналлар. Эрэгийиэн дьоҥҥо тугу көрдөрөрө элбэх, бриллиант эрэ буолбатах. Бүгүн Саха сирэ креативнай технологиялар эйгэлэригэр эрэллээхтик бас-көс миэстэни ылар. Туспа кэскиллээх салаанан киинэ сайдыыта буолар. Саха режиссердарын киинэлэрэ киинэ бэстибээллэригэр бириистээх миэстэлэри ылаттыыллар, кириитиктэр болҕомтолоруттан түспэттэр, кинини сэргиир дьон атын дойдуларга үксээн иһэллэр. Онон өрөспүүбүлүкэ павильонугар сылдьыбыт киһи бэйэтин хараҕынан Саха сирин көрүөн, хайдах олорорун билиэн баҕарыа”, — диир РФ Бырабыыталыстыбатын Бэрэссэдээтэлэ-УИФУо РФ Бэрэсидьиэнин боломуочуйалаах бэрэстэбиитэлэ Юрий Трутнев.
“Уһук Илин улаханнык сайдар кыахтаах, үлүгэрдээх сир баайдаах Арассыыйа ураты сирэ буолар. Ол эрээри, кини саамай сүрүн баайа – күүстээх санаалаах, талааннаах, хоһуун дьоно буолаллар. Биһиги Уһук Илин уонна улуу Арассыыйа сайдарын туһугар бииргэ үлэлииргэ бэлэммит. IX Илиҥҥи экэнэмиичэскэйпуорум ыалдьыттарын Саха сирин павильонугар ыҥырабын. Кинилэр манна олорор элбэх омук үгэстэрин, биһиги ситиһиилэрбитин, кэскиллээх былааммытын туһунан билиэхтэрэ”, — диэн бэлиэтээтэ Ил Дархан Айсен Николаев.
Экспозиция сүрүн былаһаакката үс зонаҕа арахсыа: сүрүн павильон, атыылыыр-быыстапкалыыр зона уонна сцена. Быйыл сүрүн павильон сайыҥҥы айылҕа көстүүлээх буолуоҕа, сахалыы үгэһинэн киэргэтиэхтэрэ. Эрэгийиэҥҥэ кэлиэн баҕалаах дьоҥҥо туризм зоната үлэлиэҕэ. “Өймөкөөн – тымныы полюһа” кластеры, “Лебединэй” хайаҕа хайыһардыыр комплексы, “Өлүөнэ очуостара” айылҕа пааркатын, о.д.а. билсиэхтэрэ.
Маны тэҥэ павильоҥҥа суолталаах инвестиционнай бырайыактар көрдөрүүгэ туруохтара. Олор быыстарыгар Жатайдааҕы судоверфь, Найбатааҕы муора порда, «Джалинда – Мохэ» Саха сирин уонна Кытайы ситимниир суол, Эльгаттан Охотскай муораҕа тиийэр тимир суол, о.д.а.
Атыылыыр-быыстапкалыыр зонаҕа экспозицияны олохтоох ааттаах-суоллаах бородууксуйалар эбэн биэриэхтэрэ. Ыалдьыттар уонна кыттааччылар ювелирнай оҥоһуктары, сувенирдары атыылаһыахтара.
Ордук улахан болҕомтону култуурунай бырагыраама ылыаҕа. Фольклору, аныгы муусуканы, классическай искусствоны көрдөрүөхтэрэ, спортивнай күрэхтэһиилэр ыытыллыахтара, киэһэтин сахалыы киинэлэри көрдөрүөхтэрэ, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.
Сообщить об опечатке
Текст, который будет отправлен нашим редакторам: