Саха сирэ уонна Узбекистан бииргэ үлэлээһини кэҥэтиэхтэрэ

Саха сирэ Узбекистаны кытта бииргэ үлэлээһиҥҥэ туризмынан эрэ муҥурданыа суоҕа. Бииргэ үлэлээһиннэр атыы-эргиэн, үөрэх уонна култуура сайдыытыгар туһуланыахтара. Ол туһунан Дьокуускайга доҕордуу дойдулар туристическай кыахтарын билиһиннэриитигэр СӨ Бырабытаалыстыбатын Бэрэссэдээтэлин солбуйааччы Анатолий Семенов иһитиннэрдэ.

«Бастатан туран, тас атыы-эргиэн хайысхатын сайдыытыгар үлэлиибит. Биһиэхэ, биллэн турар, ханнык хайысхаҕа сайдарбыт биллэр. Биһиги тас атыы-эргиэн хайысхатыгар эргитэн таһаарыыбыт ааспыт сылга 2 мөл. дуолларга тэҥнэстэ уонна салгыы улаатар»,-диэтэ вице-премьер.
Узбекистан туризмын кэмитиэтин Бэрэссэдээтэлин бастакы солбуйааччы Джамшид Абдусаламов дойдуларыгар туризм экэниэмикэ сайдыытын биир стратегическай хайысхатынан буоларын бэлиэтээтэ.

«Былырыын өрөспүүбүлүкэҕэ туристарын ахсаана 10,2 мөл. киһи буолбут, олортон 850 тыһыынча турист — Российскай Федерация гражданнара. Быйыл Арассыыйаттан 1 мөл. тахса ыалдьыты күүтэбит. Арассыыйа куоратын кытта авиарейстар сырыылара нэдиэлэҕэ 280 кэриҥэ оҥоһуллар», — диэтэ Джамшид Абдусаламов.

Владивостокка Узбекистан генеральнай консула Юсуп Кабулжанов култуурунай-гуманитарнай эйгэҕэ эрэ буолбакка, экэнэмиичэскэй көрүҥүнэн эмиэ бииргэ үлэлээһиннэр салҕаныахтара диэн эрэнэрин биллэрдэ.

Бырабыыталыстыба Бэрэссэдээтэлин солбуйааччы Анатолий Семенов Хотугулуу-Илиҥҥи федеральнай университекка Узбекистантан 22 устудьуон үөрэнэрин бэлиэтээтэ. «Биһиги бары хайысхаларынан бииргэ үлэлээһини кэҥэтиэхпитин наада. Устудьуоннарбытын Узбекистаҥҥа үөрэххэ ыытарга бэлэммит»,- диэтэ вице-премьер. Култуурунай өттүнэн хардарыта бииргэ үлэлээһиннэр норуоттар икки ардыларынааҕы сибээстэри бөҕөргөтүүгэ сүҥкэн суолталаах.
«Биһиэхэ тыйаатырдар хас да гастроллара ыытыллыбыттара. Кэлэктииптэр Узбекистаҥҥа элбэхтик сыанаҕа тахсалларын баҕарабыт. Биһиги кинилэргэ көрдөрөрбүт, кэпсиирбит олус элбэх. Ону таһынан креативнай индустрия хайысхатыгар, киинэни уонна анимацияны киллэрэн туран, бииргэ үлэлэһэргэ бэлэммит», — диэн Анатолий Семенов эбэн эттэ.

Узбекистан дэлэгээссийэтэ Дьокуускайга сылдьан Саха сирин салалтатын кытта мэдиссиинэ, успуорт эйгэтигэр бииргэ үлэлээһиннэр инники кэскилин, Саха сирин уонна Узбекистан икки ардыларыгар табаар эргиирин судургутутуу уонна элбэтии боппуруостарын дьүүллэһиэхтэрэ.

Санатан эттэххэ, Узбекистан хамаандата Дьокуускайга ыытыллыбыт «Азия оҕолоро» сайыҥҥы VIII норуоттар икки ардыларынааҕы успуорт оонньууларыгар саамай элбэх кыттааччылаах этэ. 178 спортсменнааҕа бэлиэтэммитэ. Күрэхтэһии түмүгүнэн Узбекистан спортсменнара 88 наҕарааданы ылбыттара: 36 кыһыл көмүс, 31 үрүҥ көмүс уонна 21 боруонса мэтээли.

СӨ Ил Дарханын уонна Бырабыыталыстыбатын пресс-сулууспата