Саха сиригэр биир эрэ сиргэ сөтүөлүүр көҥүллэнэр

Былырыын санитарнай-эпидемиологическай ирдэбилгэ олоҕуран Дьокуускайга, Бүлүүгэ уонна Мэҥэ Хаҥалас улууһугар сөтүөлүүр көҥүллэнэр эбит буоллаҕына, быйыл биир эрэ сиргэ. Ханна?

Быйыл санитарнай-эпидемиологическай түмүгүнэн Мэҥэ Хаҥалас улууһун “Хотун Мааччыйа” күөлгэ эрэ сөтүөлүүр көҥүллэнэр. Бу туһунан Роспотребнадзор Саха сиринээҕи управлениета иһитиннэрэр.

Дьокуускай куоракка 202-с түөлбэттэн уонна куорат аттыгар баар атын сөтүөлүүр сирдэртэн бэс ыйыттан саҕалаан нэдиэлэ аайы уу анаалыһын оҥороллор. Микробиологическай 14 боруоба, вирусологическай 11 боруоба, коронавируска 11 боруоба, санитарнай-химическэй уонна паразитологическай чинчийиилэргэ биирдии боруоба ылыллыбыт. Итинтэн Табаҕа боротуокатыттан (Хатас с.), Күөх Хонууга Сэргэлээх, Хатыҥ Үрэх, Ытык Күөл (Дьокуускай к.), Леонтьевскай күөлтэн (Маҕан с.)  ылыллыбыт 6 микробиологическай көрдөрүү боруобата ирдэбилгэ сөп түбэспэт.

Манан сибээстээн, Роспотребнадзор “Дьокуускай куорат” куораттааҕы уокурукка сөтүөнү бобор туһунан бэлиэлэри туруорарга сурук ыыппыт. Ол эрээри, дьон анаалыһы билиммэт, бу күннэргэ уулаах сирдэр оҕо аймаҕынан туоллулар. Кинилэри ким тохтотор? Сөтүөлээбитэр бэйэлэрин буруйдара дуу…