Саха сиригэр муораҕа сөтүөлээтилэр

Арай эрэ Хара муора кытыла буоллаҕай? Биһиэхэ да, тус хоту муораҕа сөтүөлүүллэр. Биир нэдиэлэ анараа өттүгэр Усуйаана улууһун саамай түгэх сытар Дьүкээгир бөһүөлэгин олохтоохторо чааһынай вездеходунан Лаптевтар муораларыгар сөтүөлээн кэллилэр. Куйаар ситиминэн кинилэр хаартыскалара: “Монако буолбатах, ол эрээри бэйэбит муорабыт” диэн суруктаах тарҕаммытын үгүс киһи сөхтө, ымсыырда, сорох итэҕэйбэтэ.

Нэһилиэк баһылыга Егор Томскайтан бу туһунан туоһуластыбыт.

— Кырдьык,  бу биһиги дьоммут Лаптевтар муораларыгар сөтүөлээбиттэрэ. Биһиги бөһүөлэктэн сөтүөлээбит сирдэрэ 2,5 км тэйиччи сытар. Уу түһэрин саҕана бааннай курдук кыра уу хаалааччы. Ол олус сылаас буолар. Сыл аайы кэриэтэ дьылыттан көрөн, итинник сөтүөлүүллэр. Онон сайын кэлэн ааспытын кыратык да буоллар билэбит. Биһиги  суола-ииһэ суох сиргэ олоробут. Улуус киинигэр диэри бөртөлүөтүнэн көтөбүт. Бырайыаспыт сыаната – 8000 кэриҥэ. Төһө киһи сайаапкалаабытынан, борт туоларынан көтөр.