Саха сиригэр булуллубут Кытай фарфоровай иһитин НТВ телеханаал уста кэллэ

Былырыын Дьокуускай остуруога турбут сирин хаһа сылдьан, олус интэриэһинэй ойуулаах иһити булбуттара. 

Дьокуускай остуруога турбут сиригэр былырыыҥҥыттан «НПО «Северная археология – 1» ОО археологическай хаһыылары ыыта сылдьар. Салайааччынан археолог Иван Фролов иккис сылын үлэлиир. Былырыын туос суруктары кытта араас элбэх булумньу көстүбүтэ. Олортон биирдэстэрэ кытай фарфоровай иһитин үлтүркэйдэрэ буолар.

Биһиги өбүгэлэрбит былыр-былыргыттан Кытайы кытта атыы-эргиэн өттүнэн сибээстээхтэрин бу  үлтүркэйдэр кэпсииллэр. Оннооҕор былыргы көмүүлэргэ көстөр оҕуруолар эмиэ онтон киирэр буолуохтаахтар.

Бүгүн НТВ устар бөлөҕө бу кытай фарфоруттан оҥоһуллубут иһитин туһунан уста кэллэ диэн ХИФУ ТГ ханаала суруйар. Иһити быһа холуйан XVII-XIX үйэтээҕи диэн сыаналыыллар. Иһит ойуутун олус интэриэһинэй – биир өттүгэр ыт туһунан кэпсэнэр, анараа өттүгэр – эбисийээнэ туһунан.

Билигин бу ураты булумньу ХИФУ археологияҕа, этнографияҕа түмэлигэр хараллан турар.