Саха сиригэр “Магнит” маҕаһыын аһыллыаҕа

Саха сиригэр “Магнит” бастакы маҕаһыыннара эһиил аһыллыахтара. Ити туһунан сөбүлэҥҥэ олохтоох Бырабыыталыстыба уонна “Тандер” АУо илии баттастылар.

Саха сирин бырабыыталыстыбатын бэрэссэдээтэлэ Кирилл Бычков бэлиэтээбитинэн, бу эрэгийиэҥҥэ ырыынак сайдыытыгар көмөлөһүөҕэ.

“Бу өрөспүүбүлүкэҕэ ырыынак сайдарыгар  суолталаах хардыынан буолар. Дойду биир бөдөҥ тэрилтэтин кытта бииргэ үлэлэһии туһалааҕа биллэр. Бастатан туран, табаар арааһа эбиллиэҕэ. Өрөспүүбүлүкэ олохтоохторо федеральнай ситим удамыр сыаналаах талан ылар эгэлгэ табаарын ылар кыахтаныахтара. Бу өссө биир үтүө өрүтүнэн саҥа үлэ миэстэтэ тахсыыта буолар”, – диэн Кирилл Бычков бэлиэтээтэ.

Бииргэ үлэлэһии табаар чэпчээһинигэр эрэ буолбакка, олохтоох аччыгый биисинэс сайдарыгар көҕүлүөҕэ диэн этэр.

“Тандер”  хампаанньа бэрэстэбиитэлэ этэринэн, улахан болҕомтону икки көрүҥү сайыннарыыга ууруохтара: эгэлгэ бородуукталаах уонна хамаҕатык туһаныллар табаардардаах “дьиэ аттынааҕы” маҕаһыыннарга уонна “Магнит Косметик” анал маҕаһыыннарга. Хампаанньа бэйэтин былаанын олоххо киллэрэригэр Саха сиригэр бастакы бииргэ үлэлэһэр франчайзи-тэрилтэтин булбут. Быйыл сайын “Магнит” бииргэ үлэлэһиинэн эрэгийиэн урбаанньыттарын кытта көрсүһүүнү тэрийиэҕэ.

Саха сирин Бырабыыталыстыбатын кытта сөбүлэҥ баттаһыы иитинэн, “Магнит” социальнай өттүнэн көмүскэлэ суох нэһилиэнньэҕэ анаан аһымал бырагыраамалары олоххо киллэрэр толкуйдаах. Ону таһынан, хаачыстыбалаах уонна куттала суох аһылыгы атыылаһыы култууратын тарҕатыыга туһаайыллыбыт тэрээһиннэргэ кыттарга бэлэм.

Бу туһунан Ил Дархан уонна Бырабыыталыстыба пресс-сулууспата суруйар. Сиһилии манна ааҕыҥ.