Саха сиригэр РФ Бэрэсидьиэнин быыбарыгар 21 быстах кэмнээх быыбардыыр учаастак аһыллыаҕа

Быстах кэмнээх учаастактар Алдан, Анаабыр, Булуҥ, Эдьигээн, Ленскэй, Мииринэй, Нерюнгри уонна Ньурба оройуоннарыгар, ону таһынан Дьокуускай куорат балыыһаларыгар аһыллыахтара диэн СӨ Киин быыбардыыр хамыыһыйатын сэкирэтээрэ Алла Самойлова эппитин туһунан ТАСС иһитиннэрэр.

«Быстах кэмҥэ быыбардааччылар олорор сирдэригэр, быыбар хампаанньатын кэмигэр, саҥа быыбардыыр учаастактары арыйаллар. Саха сирин киин быыбардыыр хамыыһыйата тохсунньуга быыбардааччылар быстах кэмҥэ олорор сирдэригэр 21 быыбардыыр учаастагы тэрийэр туһунан уураах ылыммыта. Сүрүннээн бу куоластыыр бырааптаах вахтовай бөһүөлэктэргэ олорон үлэлиир Арассыыйа Федерациятын гражданнара буолаллар», — диэн Алла Самойлова кэпсээтэ. Кини өссө икки быстах быыбардыыр учаастак Дьокуускай куорат балыыһаларыгар, улуустартан эмтэнэ сытар быыбардааччыларга анаан аһыллыахтара диэн чопчулаан биэрдэ.

Дьокуускайы таһынан, быстах быыбардыыр учаастактар Алдан, Анаабыр, Булуҥ, Эдьигээн, Ленскэй, Мииринэй, Нерюнгри уонна Ньурба оройуоннарыгар аһыллыахтара. Оттон табаһыттарга, полярнай ыстаансыйалар үлэһиттэригэр болдьоҕун иннинэ куоластааһын ыытыллыаҕа.

Бэлиэтээн эттэххэ, Саха сиригэр билиҥҥитэ 790 быыбар олохтоох учаастага баар.