«Саха сирин амтана» гастрономия бэстибээлэ быйыл 12 төгүлүн ыытыллар

Ахсынньы 25-30 күннэригэр өрөспүүбүлүкэ киин куоратыгар кыһыҥҥы кэм биир саамай күүтүүлээх тэрээһинэ «Саха сирин амтана»  гастрономическай бэстибээл 12-с төгүлүн ыытыллыаҕа.

Быйылгы «Кыһын Саха сириттэн саҕаланар» суолталаах бэстибээл чэрчитинэн буолар тэрээһин киин куорат эрэстэрээннэрин биир кэмҥэ түмэн, таһымнарын үрдэтэр соруктаах. Саха аһын амтанын сырдатар бэстибээл 2009 сыллаахха “Строганина” тэрээһинтэн кынаттаммыта. 2016 сыллаахха «Russian Event Awards – 2016» событийнай туризм Национальнай бириэмийэтинэн “Гастрономическай туризм эйгэтигэр бастыҥ туристическай событие” диэн номинацияҕа бэлиэтэммитэ.

Сыл аайы  “Саха сирин амтана” бэстибээлгэ Арассыыйа эрэгийиэннэрин  ааттаах-суоллаах асчыттара кэлэн уопуттарын атастаһан, ыччаттары пуобар алыптаах  идэтигэр уһуйан бараллар. Тэрээһин сылтан сыл кыттааччыта элбээн, куорат эрэстэрээннэрэ Саха сирин этиттэн, үүт аһыттан, отонуттан, үүнээйититтэн оҥоһуллар ас араас көрүҥүн айан, үлэлэригэр сонун сүүрээннэри киллэрэллэр.

Былырыын тэрээһин эспиэрдэринэн  Марий Эл өрөспүүбүлүкэтиттэн Иван уонна Юлия Антроповтар буолбуттара. Кинилэр «Махтал» эрэстэрээҥҥэ национальнай куукуналарын билиһиннэрбиттэрэ.

Быйыл бэстибээл ыалдьыттарынан Камчатка аатырбыт ресторатордара — «Наше место Камчатка» эрэстэрээн шеф-пуобара Павел Васильев уонна «Сан Марино» эрэстэрээни бас билэр Марина Титова буоллулар. Павел Васильев Арассыыйа, Турция,  Азербайджан, Франция, Швейцария, Алжир, Индия, Узбекистан национальнай кулинарнай ассоциацияларын чилиэнэ,  «Where to Eat 2023, 2024, 2025» Уһук Илин шеф-пуобардарын биэс иһигэр киирэр бастыҥ пуобардарыттан биирдэстэрэ. Онон быйыл эмиэ Дьокуускай куорат эрэстэрээннэрин шеф-пуобардара ааттаах-суоллаах исписэлиистэри кытта чугастык алтыһан, санааларын истэн, сонун сүүрээннэринэн таһымнарын үрдэтэргэ бэлэмнэр.

Бэстибээли тэрийээччилэр — Дьокуускай куорат уокуругун дьаһалтата уонна СӨ ыалдьыттары көрсүү ассоциацията.

— Ресторатордар бэйэ-бэйэлэрин кытта  ыкса сибээстээхтэр,  куонкуруска ким хайдах бэлэмнэммитин кэтээн, үөрэтэн көрөн күөн көрсөллөр. Ас астааһыҥҥа туттуллар тума араастарын эрэстэрээннэргэ амсайан баран, билигин үгүс хаһаайка дьиэлээхтэрин күндүлээн үөрдэр буолла. Дойдуга биллэр ааттаах-суоллаах, уопуттаах асчыттар  Саха сирин эрэстэрээннэрин шеф-пуобардарын кытта санааларын атастаһаллара, сүбэлииллэрэ — «Саха сирин амтана» гастрономическай бэстибээл биир сүрүн соруга. Саха сирин аһы-үөлүн сүрүн уратыта – айылҕа чээлэй күөх отунан аһаабыт ынах сүөһү этэ уонна үүт аһа, сылгы уонна убаһа минньигэс этиттэн оҥоһуллубут эт ас, ыраас ууга уста сылдьар балыга, Байанай күндүлээбит кыылын-көтөрүн этэ. Саха куукунатын аһын-үөлүн биирдэ амсайбыт киһи умнубат. Саха аһын ураты амтанын билбит киһи бу ас-үөл ис устуоруйатын үөрэтэн барар, күннээҕи аһыгар туттар буолар. Бу суолталаах тэрээһини Саха сирин урбаанньыттара бары бииргэ сомоҕолоһон өйүүр буолбуттара хайҕаллаах суол, — диэн бэлиэтиир «Саха сирин амтана» гастрономическай бэстибээл Саха сирин ресторатордарын  уонна СӨ ыалдьыттары көрсүү ассоциациятын салайааччыта, «Саха сирин амтана» гастрономическай бэстибээли төрүттээччилэртэн биирдэстэрэ Татьяна Тымырова.

Үгэс быһыытынан өрүү кыттар эрэстэрээннэри тэҥэ, быйыл «ASAI»,«КИВИС», «Naraada Village» эрэстэрээннэр, «Дойдум aha» кафе аан бастаан куонкуруска кыттыахтара. Ыраахтан кэлбит ыалдьыттарга саха этническэй култууратын көрдөрөр «Муус Хайа» эрэстэрээҥҥэ — «Өбүгэ aha» Виктория Петрова ааптарыскай маастар-кылааһа уонна П.А. Ойуунускай аатынан литературнай түмэлгэ  «Хомус амтана: Дорҕоон. Былыргы кэм. Гастрономия» диэн сонун тэрээһиннэр ыытыллыахтара.

Ааптар хаартыскалара