“Саха сирин бриллианнара” — дьиэ кэргэн таптала, айар кут кыната!

РФ Норуоттарын сомоҕолоһууларын уонна СӨ Култуура сылларыгар анаан, А.Е. Кулаковскай аатынан Норуоттар доҕордоһууларын дьиэтигэр Зоя уонна Афанасий Соловьевтар салайааччылаах «Бриллианты Якутии» үҥкүү тыйаатыра «Многогранные мамы» диэн далааһыннаах бырайыага буолан ааста.

Үҥкүүһүт оҕо ийэтэ буолуу — көстүбэт улахан үлэ. Ол эрээри бу сырыыга ийэлэрбит бэйэлэрэ сыанаҕа таҕыстылар. 100-тэн тахса талааннаах ийэ уонна эбээ (“Искорки”, “Кокетки”, “Божьи коровки”, “Звездочки”, “Куклы”, “Бриллианты”)  кыттыһан, ийэ ситиһиилээх, көхтөөх, кэрэ уонна элбэх талааннаах буоларын дакаастаатылар. Бүтүн дьиэ кэргэнинэн кыттан, ис талааннарын арыйар ураты кэрэ тэрээһиннэрэ буолла.

Төрөппүт: “Бу бырайыак нөҥүө ийэ оҕотугар тылынан буолбакка, бэйэтин холобурунан култуура үгэһин, айар кут күүһүн тиэрдэр эбит диэн өйдөөтүбүт. Дьиэ кэргэнинэн сомоҕолоһорго маннык тэрээһиннэр наадалар! Ийэ бэйэтэ үҥкүүлүүрүн, айарын-тутарын көрдөҕүнэ, оҕо култуураны ис  сүрэҕинэн ылынар”.

Тыйаатыр салайааччыта Зоя Соловьева кыттыбыт дьиэ кэргэттэргэ ис сүрэҕиттэн махтанна:

“Бу күрэххэ бэлэмнэнэр, санааны олоххо киллэрэр күннэр эһиэхэ умнуллубат өйдөбүлү хааллардылар. Ол эрээри саамай сүрүнэ — эһиги бары биир улахан, иллээх дьиэ кэргэн курдук буоллугут! Ол аата биһиги сүрүн сыалбытын ситистибит! Дьүүллүүр сүбэ,  көрөөччүлэр бары биир  сомоҕо буолбуккутун көрөн ис сүрэхтэн сөхтүлэр. Эһиги бары — дьиҥнээх кыайыылаахтаргыт! Тус олоххутугар дьолу-соргуну, өссө да саҥа айар үрдэллэри баҕарабын. Ийэ дьоллоох буоллаҕына — дьиэ кэргэн бигэ туруктаах, ийэ талааннаах буоллаҕына — оҕо кынаттаах!”

Яна Угарова, дьүүллүүр сүбэ чилиэнэ: “Мин бу куонкурус үрдүк таһымыттан олус соһуйдум уонна астынным! Манна дьиҥнээх артистар — оҕолор да, ийэлэр да – мустубуттар. Бэйэм ийэ, эбээ буолан, бу төһөлөөх күүһү-кыаҕы эрэйэрин бэйэм эппинэн-хааммынан билэбин. Хас биирдии оҕону дьарыкка таһыы, кинилэри иитии-үөрэтии, дьиэ кэргэн түбүгүн кытта дьүөрэлээһин улахан үлэттэн тахсар. Ол иһин бүгүн манна кытта кэлбит элбэх оҕолоох төрөппүттэри өссө ордук истиҥник өйдүүбүн уонна сыаналыыбын.

Ийэ диэн Шива таҥара курдук — барыны бары сатыыра хайҕаллаах! Кини оҕотугар быраас да, учуутал да, аһы астааччы да, дьиэни көрөөччү да буолар. Онтон бүгүн биири итэҕэйдим: ийэ өссө дьиҥнээх үҥкүүһүт, ырыаһыт уонна сыана сулуһа эбит! Ийэ  — дьиэ кэргэн кута, иэйиитин төрүтэ. Бу куонкурус — олох оскуолата, манна кыттыбыт хас биирдии оҕо ийэтин дьиҥнээх кыаҕын көрөн, кининэн киэҥ туттар буолар. «Бриллианты Якутии» салайааччыларыгар Зоя уонна Афанасий Соловьевтарга улахан махталбытын тиэрдэбит! Мин санаабар, бу бырайыагы Саха сирин иһинэн эрэ хаалларбакка, аан дойду таһымыгар таһаарыахха наада! Биһиги ийэлэрбит кэрэлэрин, дьоҕурдарын уонна саха мааны таҥаһын бүтүн аан дойду көрүөхтээх. Хас биирдии ийэ — дьиҥнээх сулус уонна героиня!”

300-тэн тахса киһини, бүтүн дьиэ кэргэттэри маннык түмэн тэрийэн үлэлэтии чахчы да сыанан аҕаабат. Көрөөччүлэри ордук аҕалар көхтөөх кыттыылара  соһутта. Күрэх түмүгүнэн, кыайыылааҕынан креативнай, үрдүк таһымнаах көстүүмнэрдээх «Куклы» бөлөх буолла. Кинилэри эҕэрдэлиибит! Бриллианты Якутии» тыйаатырбыт —  оҕолорбутугар уонна төрөппүттэрбитигэр сирдьит сулус буоллун! Оҕолорбут үөрүүттэн харахтара умайа сылдьан: «Биһиги бары бииргэ сатаатыбыт!» — диэн этэр түгэннэрэ — бу буолар Саха сирин саамай күндү бриллиана, саамай үрдүк кыайыыта!

Чэмэлиинэ Скрябина.