Саха сирин быыбардыыр тиһигэ дойду сүрүн быыбарыгар бэлэм

Бу туһунан бүгүн, кулун тутар 12 күнүгэр, брифиҥҥэ өрөспүүбүлүкэ Киин быыбардыыр хамыыһыйатын бэрэссэдээтэлэ Евгений Федоров иһитиннэрдэ.

Кини Саха сирин быыбардыыр тиһигэ дойду дьоһун быыбарыгар  — Арассыыйа Бэрэсидьиэнин быыбарыгар үрдүк бэлэмнээҕин бэлиэтээтэ.

“Бүгүн куттал суох буолуутун хааччыйыыга, баһаары утары үлэттэн саҕалаан терроризмы утары үлэ барыта толору ыытылынна. 333 учаастакка көһөрүллэ сылдьар металлодетектордар бааллар, атыттарга илии киэнэ туһаныллыахтара. Баһаары утары сулууспалар үлэлэрэ ыытылынна, уот барар түгэнигэр холбуурга саппаас источниктар бааллар, сибээс ситимэ олохтонно”, — диэтэ Саха сирин Киин быыбардыыр хамыыһыйатын бэрэссэдээтэлэ.

Евгений Федоров этэринэн, кулун тутар 6 күнүгэр учаастактааҕы хамыыһыйалар  быһаччы үлэлэригэр киирдилэр. Бары быыбардыыр хамыыһыйаларга быыбардыыр бүлүтүөннэр тиэрдилиннилэр,  хамыыһыйалар технологическай тэриллэринэн уонна оргтиэхиньикэнэн хааччылыннылар. Саха сиригэр дойду Бэрэсидьиэнин быыбарыгар 811 учаастак аһыллыаҕа, ол иһигэр 790 бастайааннай уонна 21 быстах кэмҥэ үлэлиир.

СӨ Ил Дарханын уонна Бырабыыталыстыбатын пресс-сулууспата