До выборов президента РФ
00 дней
:
00 часов
:
00 минут
:
00 секунд
Саха сирин чэчирии сайыннаран уонна үгэстэри харыстаан: АЛРОСА Хоту дойду төрүт норуоттарын хайдах өйүүрүй?

Саха сирин чэчирии сайыннаран уонна үгэстэри харыстаан: АЛРОСА Хоту дойду төрүт норуоттарын хайдах өйүүрүй?

Ааптар:
05.10.2023, 10:34
АЛРОСА архыыбын хаартыската.
Бөлөххө киир:

Алмаас хампаанньата эрэгийиэн бырабыыталыстыбатын уонна өрөспүүбүлүкэҕэ Хоту дойду аҕыйах ахсааннаах төрүт норуоттарын ассоциациятын кытары бииргэ үлэлииргэ үс өрүттээх сөбүлэһиигэ илии баттаата.

Бырамыысыланнас үгүс хампаанньалара саҥа туһа­лаах баайдаах сирдэри көрдөөн, хотугу сирдэр-уоттар диэки хайыһаллар. Көһөҥө уруудалары кистээбит түгэҕэ биллибэт киэҥ хонуулар хаарынан бүрүллэн сыталлар… Сорохторго Арктика – бу сайдыы кэскиллээх сирэ-уота буол­лаҕына, Хоту дойду аҕы­йах ахсааннаах норуоттарын бэ­­рэстэбиитэллэригэр – бу уйаннык таптыыр уонна харыстыыр алаһа дьиэлэрэ.

АЛРОСА архыыбын хаартыската.

АЛРОСА үгүс сыллар тухары Саха сирин Арктика оройуоннарын көхтөөхтүк өйүүр, кинилэргэ үбүнэн-харчынан тус сыаллаахтык көмөлөһөр. Кэнники алта сыл устата АЛРОСА Хоту дойду аҕы­йах ахсааннаах төрүт норуоттара түөлбэлээн олорор оро­йуоннарыгар уонна сирдэригэр-уоттарыгар биир мил­лиартан тахса солкуобай кээмэй­дээх тус сыал­лаах көмөнү оҥордо. Итини таһынан, кэккэ дьоһун суолталаах социальнай эбийиэктэри тутууну уонна өрөмүөннээһини үбүлээтэ: Дьааҥы улууһугар уһуйааннары, Баатаҕай бөһүөлэгэр уонна Эдьигээн сэлиэнньэтигэр мэдис­сиинэ тэрилтэтин, ону тэҥэ Зырянка бөһүөлэгэр култуура уонна успуорт комплексын. Хампаанньа социальнай эбийиэктэри тутар эрэ буолбакка, төрүт норуоттар төрүт култуураларын, тылларын уонна фольклордарын харыстааһыны кытта ситимнээх көҕүлээһиннэри көхтөөхтүк өйүүр.

“Биһиги хардарыта ытыктабыллаахтык, сиргэ-уокка уонна үгэстэргэ харыстабыллаахтык сыһыаннаһан үлэлииргэ кыһанабыт. Үлэбит түмүгүнэн киэн туттар, кыбыстыбат курдук үлэлииргэ дьулуһабыт. Бу үлэ­лиир сирдэрбит олохтоохторун өйөбүлэ суох маны ситиһэр кыаллыбатын өйдүүбүт. Тиһиктээх үлэни ыытыахха, биирдэ эрэ эбэтэр кылгас болдьохтоох сөбүлэһиилэри түһэрсэр табыллыбат. Хоту дойду олохтоохторун, аҕыйах ахсааннаах төрүт норуоттары куруук өйүөххэ, кинилэр бу ытыктабылы уонна өйөбүлү билэллэрин курдук, — диэн чопчулаан этэр АЛРОСА генеральнай дириэктэрэ Павел Маринычев.

АЛРОСА архыыбын хаартыската.

АЛРОСА социальнай-экэнэмиичэскэй сайдыыны сэргэ материальнайа суох култуура нэһилиэстибэтин харыс­тааһыҥҥа үлэлиир. Хоту дойду аҕыйах ахсааннаах төрүт но­­руоттарын өбүгэ саҕаттан олохторун-дьаһахтарын уонна бултарын-алтарын харыс­тааһыҥҥа АЛРОСА Экологияҕа киинэ көхтөөх үлэлиир уонна этнокултуура бырайыактарын олоххо киллэрэр. Хампаанньа Экологияҕа киинин өйөбүлүнэн 2019 сыллаахха “Өбүгэлэр тыллара” Хоту дойду норуоттарын өрөспүүбүлүкэтээҕи айар бэстибээлэ, онтон 2020 сылга 500 тахса оҕо кыттыбыт – “Колодец сказок” оҕо куонкуруһа буолбуттара. Оҕолор айылҕаны харыстааһын, тулалыыр эйгэҕэ уонна эколо­гияҕа кыһамньылаах буолуу туһунан остуоруйалары суруйбуттара. Куонкурус түмүгүнэн үс тылынан – нууччалыы, сахалыы уонна эбэҥкилии бэчээттэммит “Колодец сказок” ураты хомуурунньук күн сирин көрбүтэ. 2022 сыл бүтүүтэ бу тылларынан саҥардыллыбыт оҕолорго аналлаах мультипликационнай киинэлэр сиэрийэлэрэ тахсыбыта.

Хоту дойду аҕыйах ахсаан­наах төрүт норуоттарыгар көмөлөһүү уонна өйөбүл куруук оҥоһулларын туһугар АЛРОСА хампаанньа өрөспүүбүлүкэ бырабыыталыстыбатын уонна Саха сирин Хоту дойду аҕы­йах ахсааннаах төрүт норуоттарын ассоциациятын кытта үс өрүттээх сөбүлэһиигэ илии баттаста. Докумуоҥҥа олоҕуран Хоту дойду аҕыйах ахсааннаах төрүт норуоттарын тылларын, култуураларын баайын уонна тирэхтээхтик сайдалларын туһугар сөптөөх усулуобуйалар олохтонуохтара.

АЛРОСА архыыбын хаартыската.

“АЛРОСА хампаанньа биһиги норуоттарбытыгар бэйэтин бырагыраамаларынан куруук көмөлөспүтэ, үлэлиир сирдэригэр-уоттарыгар олорор нэһилиэнньэни күүскэ өйөөбүтэ. Ол эрээри хардарыта быһаччы үлэлэһии, уһун болдьохтоох бииргэ үлэлээһин урут суоҕа. Бу бииргэ үлэлээһин Хоту дойду аҕыйах ахсааннаах төрүт но­­руоттарын култуураларын са­­йыннарыыга туһуланар – биһиги тылбытын-өспүтүн билээччилэри көрүү-истии, күүскэ өйөөһүн, төрүт тылбыт симэлийбэтин туһугар биһиги фольклорнай кэлэктииптэрбитин өйөөһүн. Бу бырамыысыланнас хампаанньатын уонна төрүт олохтоохтор бигэтик бииргэ үлэлээһиннэрин үтүө холобурунан атын да тэрил­тэлэргэ буоларыгар эрэнэбит”, – диэтэ Хоту дойду аҕыйах ахсааннаах төрүт норуоттарын ассоциациятын вице-бэрэсидьиэнэ Вячеслав Шадрин.

+1
0
+1
0
+1
1
+1
0
+1
0
+1
0
+1
0
Бары сонуннар
Салгыы
21 февраля
  • -35°C
  • Ощущается: -35°Влажность: 68% Скорость ветра: 0 м/с

Сообщить об опечатке

Текст, который будет отправлен нашим редакторам: