Саха сирин дронтан көмүскүүр резервистэргэ төһө хамнас төлөнөрүй?

Саха сиригэр өрөспүүбүлүкэ олоҕор-дьаһаҕар ураты суолталаах эбийиэктэри дронтан (БПЛА) көмүскүүр аналлаах мобильнай  бөлөхтөргө резервистэри хомуйуу салҕанар. Баҕалаах дьон бэйэтин сүрүн үлэтин бырахпакка эрэ бу сулууспаны тэҥҥэ дьүөрэлиэн сөп.

Резервист диэн кимий уонна байыастан туох уратылааҕый?

Саамай сүрүн уратыта — резервистэри анал байыаннай дьайыы буола турар сиригэр ыыппаттар. Кинилэр сүрүн соруктара — өрөспүүбүлүкэ иһигэр баар эбийиэктэри харыстааһын. Ону тэҥэ, резервист гражданскай киһи быһыытынан бырааба барыта харыстанар, кини бэйэтин тэрилтэтигэр үлэлиирин тохтоппот. Хантараак киһи бэйэтин баҕатынан 3 эбэтэр 5 сылга түһэрсиллэр.

Хамнас, чэпчэтии уонна мэктиэ

СӨ Байыаннай комиссарын солбуйааччыта, подполковник Виктор Мухаев иһитиннэрбитинэн, резервистэргэ толору социальнай мэктиэлэр көрүллэллэр. «Үөрэх-эрчиллии, хомуур кэмигэр киһи үлэтин миэстэтэ уонна орто хамнаһа оннунан хаалар. Судаарыстыба резервистэри таҥаһынан, страховканан уонна эрчиллэр сирдэригэр баран-кэлэр айаннарын ороскуотунан толору хааччыйар», – диэтэ кини.

Төһө төлөнөрүй?

Харчынан хааччыллыы хас да көрүҥнээх:

• Үөрэх-эрчиллии кэмигэр (ыйга):
  • Офицердарга — 43,7-тэн 56,6 тыһ. солк. диэри;
  • Рядовойдарга уонна сержаннарга — 21,5-тэн 34 тыһ. солк. диэри.
• Көннөрү кэмҥэ (эрчиллии таһынан, үлэлии сылдьар кэмҥэ ый аайы):
  • Офицердарга — 5 244–6 712 солк.;
  • Рядовойдарга уонна сержаннарга — 2 580–3 525 солк.

Маны таһынан, саҥа дуогабар түһэрсэргэ биирдэ бэриллэр харчы көрүллэр.

Хайдах суруттарыахха сөбүй?

Мобилизационнай резервэҕэ киириэн баҕалаах дьон бэйэлэрин олорор сирдэринэн военкомакка тиийиэхтэрин сөп. Ирдэнэр докумуоннар: пааспар, СНИЛС, ИНН, үөрэҕин туһунан докумуон, байыаннай билиэт, үлэ кинискэтэ (эбэтэр үлэлиир сириттэн ыстааһын туһунан ыспыраапка) уонна «Мир» каарта реквизиттара.

СӨ Ил Дарханын уонна Бырабыыталыстыбатын пресс-сулууспата