Учуонайдар сугун уонна моонньоҕон кырдьыыны бытаардалларын дакаастаатылар

Хоту сирин отонноругар — моонньоҕоҥҥо, сугуҥҥа уонна уулаах отоҥҥо — баар эттиктэр килиэккэ кырдьыытын бытаардар кыахтаахтарын Сургуттааҕы судаарыстыбаннай университет учуонайдара норуоттар икки ардыларынааҕы бөлөх састаабыгар киирэн дакаастаатылар.

Кинилэр этэллэринэн, чинчийиллибит эттиктэр инникитин чэбдигирдэр аһылыгынан, онтон салгыы фиброһу эмтиир эминэн-томунан буолуохтарын сөп. Чинчийии түмүгэ «Biomedicines» сурунаалга бэчээттэннэ.

СурГУ мэдиссиинэтин институтун дириэктэрэ Людмила Коваленко кэпсииринэн, чинчийии сүрүн эбийиэктэринэн полифеноллар буолбуттар. Бу — үүнээйилэр күн уотун сардаҥаларыттан, буортулаах үөннэртэн уонна ыарыылартан көмүскэнээри үөскэтэр этиктээхтэр.

«Билигин аан дойдуга киэҥник ыытыллар чинчийиилэр түмүктэринэн полифеноллар сүрүн биологическай дьайыылара дакаастанна: антиоксидантнай уонна искэни утары дьайыылара, метаболизм бырасыастарын салайыылара, микробтары уонна искэҥнэри утары охсуһуулара уонна да атыттар. Оттон бүтэһик сылларга полифеноллар геропротективнай, о.э. кырдьыыны утары дьайыылара күүскэ ырытыллар. Бу диэн полифеноллар килиэккэлэри эрдэ кырдьартан көмүскүүр кыахтарын ааттыыллар», — диэн быһаарда кини.

Учуонайдар этэллэринэн, чуолаан отоннорго баар полифеноллар көмүскүүр дьайыылаахтарын бигэргэттилэр. Ол курдук, саамай күүстээх дьайыы моонньоҕоҥҥо уонна сугуҥҥа бэлиэтэммит. Чинчийиигэ Сургут эргин хомуллубут отоннору туһаннылар.

«Хоту сирин отоннорун полифенолларыгар олоҕуран, чугас кэмҥэ чэбдигирдэр, туһалаах аһылыгы оҥорон таһаарыахха сөп. Оттон инникитин — фиброһу эмтиир эми-тому айар кыах баар», — диэн түмүктээтэ Людмила Коваленко.

Бу үлэни Сургуттааҕы судаарыстыбаннай университет уонна Казахстан Өрөспүүбүлүкэтин Национальнай биотехнологиятын киинин учуонайдара бииргэ оҥордулар. Чинчийии «Ыччат уонна оҕолор» национальнай бырайыак «Приоритет-2030» федеральнай бырагырааматын чэрчитинэн ыытылынна.