Саха сирин хамаандата Сочига доруобуйаларынан хааччахтаах дьон бэстибээлигэр кыттар

Сочига ыытылла турар хамсаныыга доруобуйаларынан хааччахтаах дьон успуорка Арассыыйатааҕы бэстибээлигэр Саха Сирин хамаандата кыттар. Өрөспүүбүлүкэтээҕи инбэлииттэр уопсыстыбаларын бэрэссэдээтэлэ Ирина Лебедева салайааччылаах хамаанда бэҕэһээ, күрэхтэһии маҥнайгы күнүгэр, бастакы кыһыл көмүс мэтээли ылла.

Ол курдук, дьахталларга остуол тенниһигэр Александра Слепцова чөмпүйүөн үрдүк аатын сүктэ. Бэстибээл бу иннинээҕи сылларыгар кини икки төгүл кыайыылаах буолбута.

Эр дьоннорго олорон эрэн остуол тенниһигэр Валентин Борисов чаҕылхайдык оонньоон, полуфиналга киирдэ. Бүгүн кини мэтээл иһин киирсиэ. Кини
былырыыҥҥы бэстибээл чөмпүйүөнэ.

Дартс күрэҕэр Евгений Птицын 503 очкону ылан, былырыыҥҥы көрдөрүүтүн лаппа тупсарда. Түргэн саахымакка Егор Федоров үс оонньууттан иккитин кыайан, бүгүн түөрт киирсиини ааһыаҕа. Бу бэстибээлгэ бастакытын кыттар Кирилл Неустроев 50 миэтирэҕэ харбааһыҥҥа үс иһигэр киирбэтэ эрээри, көрдөрүүтэ куһаҕана суох.

Бүгүҥҥү күҥҥэ Сахабыт Сирин хамаандатыгар саҥа кыайыылары баҕарабыт!

Альбина Тарабукина