Саха сирин олохтооҕо түөрт сылга диэри көҥүлэ быһыллыаҕа

Саха сирин суутугар хатыыс хара искэҕин сокуоннайа суох харайыы уонна эргинии туһунан холуобунай дьыаланы көрүөҕэ.

Буруйданааччы түөрт сылга көҥүлэ быһыллыаҕа уонна биир мөлүйүөн солкуобайга тиийэ ыстарааптаныаҕа. Бу туһунан ИДЬМ пресс-сулууспата иһитиннэрэр.

«Кыһыл кинигэҕэ» киирбит балык искэҕин алта контейнерын Чульман аэропордугар 40 саастаах пассажир багааһыгар булбуттар. Барыта үс киилэ хатыыс хара искэҕэ былдьаммыт. Эспэртииһэ ыыппыт быһаарыытынан, балыктар Амур уонна Калуга хатыыстара буолаллар. Бу балыктар көрүҥнэрэ дойду «Кыһыл кинигэтигэр» киллэриллибиттэрэ. Хатыыстары сокуонунан бултааһын уонна эргинэр бобуулаах.

Суут быһаарыытынан, баһыылканы 53 саастаах билэр эр киһитэ туттарбыт. Эр киһи сокуоннайа суох дьайыылары оҥорорун билэн туран, балык искэҕин салгыы атыылыырга санаммыт уонна Москваҕа контейнердары тиэрдэригэр көрдөспүт.

53 саастаах эр киһиэхэ холуобунай дьыала тэрилиннэ.