Саха сирин олохтоохторун 60-тан тахса бырыһыана успуордунан дьарыктанар

2024 сыл түмүгүнэн Саха сирин 60% тахса олохтооҕо, ол эбэтэр 560 тыһ. тахса киһи физкултууранан, ол иһигэр адаптивнай көрүҥүнэн тиһиктээхтик дьарыктанара бэлиэтэнэр.

Бу туһунан Ил Дархан Айсен Николаев СӨ Бырабыыталыстыбатын 2024 сыллааҕы отчуотугар бэлиэтээн эттэ. Маныаха успуорт эбийиэктэрэ элбээбиттэрин кытта быһаччы ситимнээҕэ бэлиэтэнэр. Аҥардас 2024 сылга Дьокуускайга, Эдьигээҥҥэ элбэх функцияны толорор успуорт саалалара, Чурапчыга култуура-успуорт комплекса, Сунтаарга успуорт комплекса киирбиттэрэ да элбэҕи этэр. Бүлүү улууһугар Кыһыл Сыырга сабыылаах каток уонна успуорт саалатын тутуута түмүктэммитэ.

—Дьон-сэргэ физкултууранан дьарыктанарыгар, чэгиэн олоххо тардыһарыгар үлэлэр туһуланаллар. Бырабыыталыстыба бу хайысхаларга үлэлэрэ өрөспүүбүлүкэҕэ суолталаахтарыгар сөпсөһөргүтүгэр эрэнэбин. Дьоҥҥо-сэргэҕэ туһалаах, — диэн этэр Айсен Николаев дьокутааттарга туһаайан. Кини бу сылга биир улахан спортивнай тэрээһининэн Таатта улууһугар ыытыллар «Манчаары оонньууларыгар» тохтоото. Маны сэргэ, «Спорт — олох нуормата» федеральнай бырайыагы олоххо киллэриини ыйда. 2024  сылга спортивнай маллар-саллар, тэриллэр Сунтаар, Уус Алдан, Мэҥэ Хаҥалас улуустарын уонна Дьокуускай куорат олимпийскай эрэллэри бэлэмниир спортивнай оскуолаларыгар ылыллыбыттар.

Бүтүн Арассыыйатааҕы «Готов к труду о обороне» (ГТО) физкультурнай-спортивнай комплекс эрэгийиэннээҕи киинэ 18 өрөспүүбүлүкэ таһымнаах тэрээһиннэри тэрийбит. 2 584 киһи ГТО нормативын туттарбыт. Итинтэн 2 007  кыһыл көмүс, 330 – үрүҥ көмүс,  247 – боруонса бэлиэлэри ылбыттар.

Сиһилии https://www.sakha.gov.ru/news/6318 манна киирэн ааҕыҥ.

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаҕа түһэриитэ, ЯСИА