Саха сирин оскуолаларыгар саҥа үөрэх дьылыгар үүнээйини олордуу саҕаланна

Мэҥэ Хаҥалас улууһун Сыымах нэһилиэгин Баатара оскуолатыгар тохсунньу ыйтан оҕолор салаат уонна оҕурсу үүннэрэр тэпилииссэлэрэ тутуллан үлэлии турар.

Биллэрин курдук, агролабораториялары тутуу – элбэх ороскуоту эрэйэр дьыала. Ол эрээри Баатара оскуолата онтон тахсар суолу булбут – үбү булууга «Алмазэргиэнбаан», Саха сирин баһылыгын иһинэн туруктаах сайдыы сэбиэтин чилиэнэ Людмила Николаева, Баатара орто оскуолатын салалтата, Мэҥэ Хаҥалас улууһун баһылыга Дмитрий Тихонов, ону тэҥэ коммерческайа суох тэрилтэлэри уонна гражданскай көҕүлээһини өйүүр биир кэлим киин кыттыспыттар.

Бу кыра дэриэбинэлэргэ оҕону сайыннарыыга кыаҕы үөскэтэр оскуола бырайыага «Среда возможностей» диэн ааттаах Тимченко пуондатын гранын ылбыт. Үөрэнээччилэр үөрэх таһынан үүнээйини бэйэлэрэ үүннэрэллэр: үүнээйи уһунун кэмнииллэр, үүннэрии технологиятын үөрэтэллэр.

Агролаборатория салайааччыта, биология учуутала Дария Жиркова кэпсээбитинэн, номнуо клубника сиэмэтин сакаастаабыттар, сотору кэминэн Уус Алдан улууһун Суоттутугар уопут атастаһа барарга былаанныыллар.

«Клубниканы бу тэпилииссэҕэ үүннэриэхпит. Өскөтүн иккис циклы аастахпытына, туспа олордуохпут», — диэн этэр Дария Степановна.

Быйыл Амма улууһун Е.А.Шишигин аатынан Сатаҕай орто оскуолата эмиэ түөрт этээстээх гидропоннай тэпилииссэлэннэ. Тэпилииссэни  быйыл саас «Экоферм» фирматтан ылбыттар. Саас оҕолор салаат үүннэрбиттэр, онтуларын остолобуойга аска кутан сиэбиттэр. Бу күһүн онтуларын сөргүппүттэр.

Оҕолор бэйэлэрэ үөрэх чааһын таһынан үүнээйилэри куруһуок салайааччыта Лия Владимировна Андреева салалтатынан кэтээн көрөллөр. «Биһиги оҕолорбут эбиэт кэнниттэн кылаас таһынааҕы дьарыкка тэпилиисэни, төһө эбии аһылыгы кутары, температураны уонна тымныыны көрөллөр. Суурадаһыннары уларыталлар уонна саҥа үүнээйини олордоллор. Билигин салаат олордобут, ол эрээри атын үүнээйи көрүҥнэрин боруобалаан ыһан эрэбит, холобур, укуруобу ыспыппыт. Оҕолору кытта научнай-практическай үлэни ыытар былааннаахпыт», — диэн Лия Владимировна санаатын үллэстэр.