Саха тыйаатыра 117-с сезонун түмүктүүр

От ыйын 2 күнүгэр Былатыан Ойуунускай аатынан Саха академическай тыйаатырыгар Чингиз Айтматов  “Буурҕалаах тохтобул” («Буранный полустанок») айымньытынан Василий Борисов туруоруутугар, СӨ үтүөлээх артыыската Софья Баранова толоруутугар «Моҥкуруут ийэтэ» моноиспэктээкил премьерата буолан ааста.

“Моҥкуруут ийэтэ” моноиспэктээкил  Ньурба куоракка «САТА-2023» XII өрөспүүбүлүкэтээҕи тыйаатыр бэстибээлигэр кыттан, дьүүллүүр сүбэҕэ кыттыбыт Арассыыйа биллиилээх тыйаатыр диэйэтэллэрэ уонна кириитиктэрэ Жанна Зарецкая, Глеб Ситковскай, Оксана Кушляева биһирэбиллэрин ылбыта. Итиэннэ бэстибээл “Үһүйээн уонна дьиҥ олох алтыһыытын иһин” диэн анал бирииһинэн наҕараадаламмыта.

Саха тыйаатыра 117-с сезонун быйыл от ыйын 14-16 күннэригэр “Коркин. Андаҕар” диэн Сергей Потапов саҥа туруоруутунан түмүктүүр. Каассаҕа билиэт олоччу атыылламмыт. Кэлэр сезон арыллыытыгар Василий Борисов уонна Сергей Потапов саҥа туруорууларын көрүөхпүт диэн эрэл баар.