Сайыҥҥы лааҕырга оҕо муннун тоһуппут: оскуола уонна буруйдаах оҕо төрөппүттэрэ 120 тыһ. солк. төлүөхтэрэ

Мэҥэ Хаҥалас оройуонун суута олохтоох дьахтар моральнай хоромньуну толуйтарар туһунан ирдэбилин сороҕун толордо диэн СӨ Сууттарын холбоһуктаах пресс-сулууспата иһитиннэрэр.

2025 сыл бэс ыйын бүтүүтэ оскуола сайыҥҥы лааҕырыгар икки уол охсуспуттар. 13 саастаах уол 12 саастаах уолу сирэйгэ охсубут, ол түмүгэр эмсэҕэлээччи муннун уҥуоҕа тостубут. Ол эрээри эмсэҕэлээбит оҕо сокуоннай бэрэстэбиитэлэ бу эчэйии туһунан, биир нэдиэлэ буолан баран, сезон сабыллар күнүгэр, оҕотун лааҕыртан ыла тиийэн эрэ баран билбит. Ол кэнниттэн оҕоҕо мэдиссиинэ көмөтүн оҥорбуттар уонна муннун уҥуоҕун чөлүгэр түһэрбиттэр. Сокуоннай бэрэстэбиитэл 13 саастаах уол төрөппүттэригэр уонна оскуолаҕа, кини уолун доруобуйатыгар оҥорбут хоромньуну толуйтарар туһунан ирдэбил түһэрбит.

Оскуола дириэктэрэ ирдэбили билиммит. Оттон 13 саастаах уол сокуоннай бэрэстэбиитэлэ ирдэбили сороҕун эрэ билиммит, оҕолор икки ардыларыгар охсуһуу буолбут диэбит. Моральнай хоромньуну толуйуу кээмэйин кини материальнай балаһыанньатын учуоттаан кыччатарга көрдөспүт.

Суут оскуола оҕолору сөптөөхтүк кэтээбэтэҕин быһаарбыт, оттон сокуоннай сааһын ситэ илик буруйдаах уол төрөппүттэрэ кини быһыытыгар эппиэтинэһи сүгэллэрин билиммиттэр. Маны таһынан, суут оскуола эппиэтинэһэ быдан улахан диэн быһаарбыт, тоҕо диэтэххэ быһылаан үөрэх тэрилтэтин хонтуруолугар киирэр сиргэ буолбут.

Эчэйии ыараханын, оҕо эт-хаан уонна өй-санаа өттүнэн эрэйи көрбүтүн, ийэтин санааҕа ылларбытын уонна эппиэттээччилэр материальнай балаһыанньаларын учуоттаан туран, суут моральнай хоромньуну толуйууну маннык уураахтаабыт:

— оскуола өттүттэн эмсэҕэлээбит сокуоннай сааһын ситэ илик оҕо туһатыгар – 50 000 солк., эмсэҕэлээбит оҕо ийэтин туһатыгар – 20 000 солк.;

— буруйдаах уол төрөппүттэриттэн – сокуоннай сааһын ситэ илик оҕо туһатыгар хас биирдиилэриттэн 15 000-лыы солк., эмсэҕэлээбит оҕо ийэтин туһатыгар – хас биирдиилэриттэн 10 000-лыы солк.

Маны таһынан, эппиэттээччилэр 23 000 солк. кээмэйдээх судаарыстыбаннай түһээни төлөөбүттэр.

Суут уурааҕа сокуоннай күүһүгэр киирэ илик.