Сардана Максимова: «Дойдубут сайдарыгар бигэ эрэллээхпин»

Бүгүн Владимир Путин Арассыыйа Бэрэсидьиэнин дуоһунаһыгар киирэр ураты күнэ буолла. Владимир Путиҥҥа итэҕэйэммит, киниэхэ эрэнэммит талбыппыт диир Горнай улууһун ыччатын лиидэрэ Сардана Максимова:

— Владимир Путин Арассыыйа Бэрэсидьиэнин дуоһунаһыгар киирэрин долгуйа көрдүбүт. Хас биирдии дойдуга түмсүүлээх буолуу, биир санаанан салайтарыы сүдү күүстээх, кэхтибэт кыахтаах судаарыстыбаны үөскэтэр. Биhиги ааспыт быыбардарга сүүһүнэн омуктаах, араас итэҕэллээх, сиэрдээх, үгэстээх, киэҥ иэннээх модун Арассыыйа дьоно-сэргэтэ биир киhи курдук Владимир Владимировиһы быыбарга талбыппыт, биир санаанан киниэхэ итэҕэйэрбитин, эрэнэрбитин бигэргэппиппит.

Биллэн турар, бу күн миэхэ долгутуулаах! Эдэр киhи, эдэр дьиэ кэргэн ийэтэ, тыа сирэ сайдыытыгар үлэлии-хамсыы сылдьар исписэлиис буоларым быһыытынан, сарсыҥҥы күммэр уонна дойдубут сайдарыгар бигэ эрэллээхпин.