Сэтиэнэҕинэн бүрүллүү баһаары үөскэтэр

Бэҕэһээ СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтигэр Экология уопсастыбаннай сэбиэтин мунньаҕа буолла. Онно өрөспүүбүлүкэҕэ баһаар сезонун түмүктэрин ырыттылар, «Саха Өрөспүүбүлүкэтин экологическай култууратын туһунан» сокуон барылын дьүүллэстилэр.

Баһаар сезонун түмүктэригэр министиэристибэ экосырдатыыга салайааччыта Владислав Велигура хоту оройуоннарга баһаар тахса сылдьыбытын бэлиэтээтэ. Ол курдук, Дьааҥыга уонна Эбээн Бытантайга. Суһал ыстаап үчүгэйдик үлэлээбитин түмүгэр нэһилиэнньэлээх пууннарга уот суоһаабатах. Халыма бөлөҕөр ардаҕы аҕалааччы көтөр аал көтүүтэ абыраабыт. 43 киһи уот туруутугар буруйдааҕынан административнай ыстараап олохтоммут.

Дьааҥыга баһаары утары төһө бэсиэдэ нэһилиэнньэ ортотугар ыытылынна диэн чопчу сыыппараны ыйыттылар. Онно уопсайынан үлэ ыытылынна диэн хоруйданна. Инникитин нэһилиэнньэни кытта биирдиилээн үлэ күүһүрүөхтээҕэр болҕомтону туһаайдылар.

Уопсастыбаннай сэбиэт сорох чилиэннэрэ баһаар туруутун бохсууга «выжигание» диэни хайдах тэрийэн ыытыыны быһаарар буоллар, көдьүүстээх буолуо этэ диэн этии киллэрдилэр. Интэриэһинэй чахчыны Россельхознадзор тэрилтэ салайааччытын солбуйааччы Татьяна Попова аҕалла. Кинилэр тыа хаһаайыстыбатын туһаныытыгар аналлаах сэтиэнэҕинэн бүрүллүбүт 166 учаастагы бэрэбиэркэлээбиттэриттэн 143 учаастак туттуллубатаҕын быһаарбыттар. Бу бэрэбиэркэлээбит сирдэрэ ойууртан чугаһынан баһаар тахсыытыгар кутталы үөскэтэллэрин бэлиэтээтэ.

Куорат олохтоохторун долгуппут кыайан көппөккө хаалбыт кустар тустарынан Булт департаменын салайааччытын солбуйааччы Егор Дьяконов, Биология институтун ыстаарсай научнай сотруднига Евгений Шемякин быһаардылар. Егор Анатольевич этэринэн, алтынньы 15-16 күннэригэр Сайсары күөлтэн бу кустары анал тэрилинэн тутуу ыытыллыбыт. Бастакы күн 22-ни, иккис күн — 20 туппуттар. Исписэлиистэр айылҕаттан астарын булунуохтаах көтөрдөрү аһатар сыыһатын эттилэр. Бу подсадной дьиэ кустарын таһааран ыытыы түмүгэр маннык көстүү тахсыбыт буолуоҕун Егор Дьяконов эттэ. Наука үлэһиттэрин өттүттэн 2019 с. бэл,  дьиикэй кустарга передатчиктарын туруоран кэтээбиттэрин Евгений Владимирович этэр. Кустар хойукка диэри көппөккө хаалбыттарын мунньах кыттыылаахтара килиимэт даҕаны сабыдыаллыан сөбүн ыйдылар. Бэйдиэ сылдьар ыттар оннуларыгар аны “маннык кустар” айдааннара туруон сөптөммүт быһыылаах. Онон подсаднойдарга сыһыаннаан чииптээһин да киириэн сөптөөх курдук.