Социальнай координатор көмөтүнэн бэтэрээн эмтэнэ киирдэ

«Аҕа дойдуну көмүскээччилэр» пуондаларын Ленскэй оройуоннааҕы салаатын социальнай координаторыттан байыаннай дьайыы бэтэрээнэ Иван А. доруобуйатын эмтэнэ барарыгар көмөлөһөргө көрдөспүт.

Иван байыаннай  дьайыыга 2023 сыл тохсунньутугар барбыт. Кини бааһыран, госпитальга өр сытан эмтэммит, онтон 1 группалаах инбэлиит буолан кэлбит. Билигин кини оронноох-тэллэххэ сытар, кырдьаҕас ийэтэ көрөр-истэр. Социальнай координатор Светлана Манакова уол дьиэтигэр хаста даҕаны сылдьан, «Госуслуга» нөҥүө мэдиссиинэ-социальнай эспэртиизсэтин хамыыһыйатыгар чөлүгэр түһэриигэ докумуоннары ыытарга көмөлөспүт.

Оттон кулун тутар ыйга Иван Дьокуускай куоракка эмтэнэ, доруобуйатын чөлүгэр түһэрэ барарга көмөлөһөргө көрдөспүт. Онон социальнай координатор Ленскэй куорат нэһилиэнньэ социальнай харыстабылын управлениетын нөҥүө сайаапка оҥорбут, ыспыраапкалары уонна тустаах докумуону толорорго анаан быраастары уол дьиэтигэр тиийэн көрөллөрүн тэрийбит.

Ол түмүгэр Иван куоракка эмтэнэ барарын арыаллааччынан кини быраатын анаабыттар. Нэһилиэнньэ социальнай харыстабылын управлениета Иваҥҥа уонна кини быраатыгар тута барар-кэлэр айаннарын төлөбүрүн төлөөбүттэр. Бу күннэргэ Иван быраатын арыаллатан өрөспүүбүлкэтээҕи социальнай-чэбдигирдэр кииҥҥэ киирэн, эмтэнэн саҕалаата диэн «Аҕа дойдуну көмүскээччилэр» пуондаларын Саха сиринээҕи салаата иһитннэрэр.