Соҕотох ийэҕэ 1,5 мөлүйүөн солкуобай кээмэйдээх алимент төлөннө

СӨ борокоротууратын салалтатыгар Уус Алдан улууһугар олорор икки оҕолоох ийэ тус кэпсэтиигэ анаан киирбит. Кини соҕотоҕун сааһын ситэ илик икки оҕону иитэрин, арахсыбыт кэргэнэ уһун кэм устата алименын төлөөбөтөҕүн иһитиннэрбит.

Онно биллибитинэн, чахчы, дьахтар урукку кэргэнэ төрөппүт оҕолоругар төлөнүөхтээх алименын ыыппатаҕа ырааппыта,  суут бириистэбин үлэһиттэрэ туох даҕаны миэрэ ылбатахтара биллибит.

Онон дьахтарга төлөнүөхтээх суумма мунньуллан 1,5 мөлүйүөн солкуобайга тэҥнэспит. Суут бириистэбин Федеральнай сулууспатын управлениетын салалтатыгар борокуратуура сурук ыыппыт. Онон икки оҕолоох соҕотох ийэҕэ өр кэм устата төлөммөккө сылдьыбыт харчы дьэ, төлөммүт диэн СӨ Борокуратууратын пресс-сулууспата иһитиннэрэр.